Yobu 5

Mawu a Mulungu mu Chichewa Chalero

5 “Itana ngati ungathe, koma ndani adzakuyankhe?
    Kodi ndi kwa mngelo uti ungapezeko thandizo?
² Mkwiyo umapha chitsiru,
    ndipo njiru imawononga wopusa.
³ Ine ndinaona chitsiru chitamera mizu,
    koma mwadzidzidzi nyumba yake inatembereredwa.
⁴ Ana ake alibe ndi chitetezo chomwe;
    amaponderezedwa mʼbwalo la milandu popanda owateteza.
⁵ Anthu anjala amamudyera zokolola zake,
    amamutengera ndi za pa minga pomwe,
    ndipo anthu akhwinthi amafunkha chuma chake.
⁶ Pakuti masautso satuluka mʼfumbi,
    ndipo kuwukira sikuchokera mʼdothi.
⁷ Komatu munthu amabadwira kuti azunzike
    monga momwe mbaliwali zimathethekera mlengalenga.

⁸ “Koma ndikanakhala ine, ndikanamudandawulira Mulungu;
    ndikanapereka mlandu wanga kwa Iye.
⁹ Iye amachita zozizwitsa zimene sizimvetsetseka,
    zodabwitsa zimene sizingatheke kuwerengedwa.
¹⁰ Iye amagwetsa mvula pa dziko lapansi,
    ndipo amathirira minda ya anthu.
¹¹ Iye amakweza anthu wamba,
    ndipo iwo amene akulira amawayika pa malo otetezedwa.
¹² Iyeyo amalepheretsa chiwembu cha anthu ochenjera,
    kotero kuti cholinga chawo sichipindula kanthu.
¹³ Iye amakola anthu ochenjera mu msampha wa kuchenjera kwawo,
    ndipo zolinga za atambwali amazithetsa msangamsanga.
¹⁴ Mdima umawagwera nthawi yamasana;
    nthawi yamasana amayenda moyambasayambasa monga nthawi ya usiku.
¹⁵ Mulungu amapulumutsa amphawi ku lupanga la mʼkamwa mwawo;
    amawapulumutsa mʼmanja mwa anthu amphamvu.
¹⁶ Choncho osauka ali ndi chiyembekezo,
    ndipo anthu opanda chilungamo amawatseka pakamwa.

¹⁷ “Wodala munthu amene Mulungu amamudzudzula;
    nʼchifukwa chake usanyoze chilango cha Wamphamvuzonse.
¹⁸ Pakuti Iye amavulaza koma amamanganso mabalawo;
    Iye amakantha munthu, komanso manja ake amachiritsa.
¹⁹ Pakuti adzakupulumutsa ku masautso nthawi ndi nthawi,
    mavuto angachuluke bwanji, sadzakukhudza ndi pangʼono pomwe.
²⁰ Pa nthawi ya njala adzakulanditsa ku imfa,
    ndipo nthawi ya nkhondo adzakupulumutsa ku lupanga.
²¹ Adzakuteteza kwa anthu osinjirira,
    ndipo palibe chifukwa chochitira mantha pamene chiwonongeko chafika.
²² Uzidzaseka pa nthawi ya chiwonongeko ndi ya njala,
    ndipo palibe chifukwa chochitira mantha ndi zirombo za mʼdziko lapansi.
²³ Pakuti udzachita pangano ndi miyala ya mʼmunda mwako,
    ndipo nyama zakuthengo zidzakhala nawe mwamtendere.
²⁴ Udzadziwa kuti nyumba yako ndi malo otetezedwa;
    udzawerengera katundu wako ndipo sudzapeza kanthu kamene kasowapo.
²⁵ Udzadziwa kuti ana ako adzakhala ambiri,
    ndipo zidzukulu zako zidzakhala ngati udzu wa mʼdziko lapansi.
²⁶ Udzafika ku manda utakalamba,
    monga mitolo ya zokolola pa nyengo yake.

²⁷ “Ife tafufuza zimenezi ndipo ndi zoona,
    choncho uzimvere ndi kuzitsata.”