Tay Kichijket 25
Ne Bibliaj Tik Nawat
Pawlo ishpan Festus wan Agripa
25 Festus ajsik tik ne provinciaj, wan kwak panutiwit yey tunal kiski Kaysarea wan yajki Yerushalem. 2 Wan walmuneshtijket ne weypalejmet wan ne achtumet ipal ne Yudayujmet kitenewat ne Pawlo wan kitajtanit, 3 wan kinekituyat kilwiat ma kalnutza ka Yerushalem, pal kipajpashuat wan kimiktiat tik ne ujti. 4 Kwakuni ne Festus nankilij ma mutajpia ne Pawlo tik Kaysarea, wan inak ka yaja yasneki ka né nemanha:
5 —Yajika —inak— su anwelit, shiwikikan nuwan wan su yaja kipia tatka tay te yek, shinakan ka né.
6 Nakak itzalan yejemet anka chikwey tunal, anka majtakti, wan yajki Kaysarea, wan ne ukse tunal mutalij tik ne kalpuli wan tatuktij ma wiki ne Pawlo. 7 Kwak kikalaktijket, ne Yudayujmet ne walajtiwit tik Yerushalem kiyawalujket, wan kichijket miak etek taishpanulis, melka te welituyat kilwitiat tatka. 8 Ne Pawlo inak ka inte kichijtuk tatka teyek ishpan ne tajtuli, nian ijtik ne teupan, nian iwan ne taltikpaktuktiani ipal Roma. 9 Ne Festus, pal naka yek iwan ne Yudayujmet, nankilij wan kilwij Pawlo:
—Tikneki titejku ka Yerushalem wan ma metzchiwakan juzgar ka ikuni ipanpa muchi ini nuishpan?
10 Inak ne Pawlo:
—Ninemi tik ne kalpuli ipal ne taltikpaktuktiani, kan ne nemi pal nechchiwat juzgar: te nikchijtuk tatka te yek iwan ne Yudayujmet, ken taja tikmati yek. 11 Asu nikchiwa tay teyek wan nemi pal nimiki ipanpa tay nikchijtuk, ma nimiki. Asu muchi tay ini takamet inat ka nikchijtuk inte tatka, kwakuni inte aka weli nechtemaka inwan. Ma ina ne taltikpaktuktiani.
12 Kwakuni ne Festus, kwak tamik kinnawatia ne tasennujnutzanimet, nankilij:
—Ne taltikpaktuktiani tikneki tikita? Itech ne taltikpaktuktiani tiasneki!
13 Panuket sejse tunal, wan Agripa, ne tatuktiani pal ne taltakutun, wan ne siwatatuktiani Berenike, ajsiket tik Kaysarea kitajpaluat ne Festus. 14 Kwak naktuyat ikuni miak tunal, ne Festus kilwij ne tatuktiani Agripa ken ijtuk iwan ne Pawlo, ina:
—Felix kiajkaw se takat tzaktuk, 15 wan kwak ninemik tik Yerushalem walejkuket nutech ne weypalejmet wan ne noymet ipal ne Yudayujmet ka kinekituyat ma muchiwa juzgar, 16 wan ninankilij ka ne Romajtakamet inte welit tatuktiat ma mumikti se takat achtu ma kipia ne tenejtuk ne tatenewanimet tik itachialis, wan ma kiajkawakan ina tay kineki ipanpa tay inat ka yaja kichijtuk. 17 Yajika, kwak walajket pal sennemit nikan, inte nishtunak nimutalia tik kalpuli wan nitatuktij ma wiki ne takat tik ne ukse tunal. 18 Ne tatenewanimet nemiket né wan te tamakaket nian se taika tay naja nikejketza te yek. 19 Sema kipiatuyat ankakeski tajtanilis ipanpa ne teumatilis wan ipanpa se itukay Yeshu ká miktuk wan ne Pawlo ina katka ka yaja yultuk. 20 Naja inte nikmati katka ipanpa uni tajtajtanilis wan niktajtanilij su kineki yawi tik Yerushalem wan ma kichiwat juzgar ka ikuni ipanpa muchi uni. 21 Kwak ne Pawlo tajtanki ma mupia tzaktuk hasta ma kikaki ne wey taltikpaktuktiani, nitatuktij ma mupia hasta niaw niktuktia ka Roma.
22 Agripa kilwij Festus:
—Naja nusan niknekiskia nikaki ne takat.
—Musta —inak— tiaw tikaki.
23 Wan ne ukse tunal ajsik ne Agripa wan ne Berenike iwan wey fantasiaj tik ne takakiluyan, iwan miaktuktianimet wan wejwey takat ipal ne techan, wan tatuktij ne Festus wan kikalaktijket ne Pawlo, 24 wan inak ne Festus:
—Tatuktiani Agripa wan muchi ne nikan nemit: shikitakan yajini, ká muchi ne Yudayujmet nechtajtantiwit tik Yerushalem wan nikan kan tinemit, wan inat wan tzajtzit ma intea muajkawa yultuk. 25 Naja inte nikejketzki tatka pal welit titatuktiat ma mumikti, wan yaja tajtanki ma mutukti itech ne taltikpaktuktiani pal muchiwa juzgar. 26 Naja te nikmati yek tay nikijkwiluskia pal nikilwia nutekuyu. Neka nalwikatuk anmuishpan, wan keski mas muishpan taja, tatuktiani Agripa, ma tikitakan wan ma nikmati tay niktajkwiluskia, 27 ika te niweli niktuktia se ilpituk asu te nikneshtia ne tajtaika.
Ne Bibliaj Tik Nawat · © 2008, 2012 Jan Morrow