Add parallel Print Page Options

Jun kˈolbebl tuˈn Pablo cyuya ke tuya cye ocslal aj Roma

16  Jxuuj Febe tbi cxeˈl tiiˈnxuj jwuˈja lu te cyey. Jun baˈn xuuj t‑akˈanal Dios cyxol ocslal tuj tnom te Cencrea. Cxeˈl ncubsaˈna nwitza cyey tuˈn t‑xiˈ cycˈojlaˈn jxuuja, tisex nbint cyxol ocslal, cuma ocslalxuj tiˈ Kaaw. Cyonenx‑xuj tuya ti cyitzˈjelaxuj, cuma nim xjal o tonenxuj, bix o tzˈonenxuj wiˈja.

Cykˈonxa jun nkˈolbebla te hermana Priscila bix te hermano Aquila. O chi akˈanan junx wuyena tuj taakˈen Cristo Jesús. Chˈixcˈama e cwaˈke tuˈntzen ncleta cyuˈn. Juˈ tzunj nim nxiˈ nkˈoˈna chjonte te cye, bix yaaˈn nuk njunala, sino cykilca kej ocslal yaaˈn judío.

Bix cykˈonxa jun nkˈolbebla te cyej ocslal nchi chmet tuj tja Priscila bix Aquila tuˈn tjaw cynimsaˈn tbi Dios. Bix cykˈonxa jun nkˈolbebla te Epeneto, jun wuyena. Jaxin tneel ocslal tiˈ Cristo tuj departamento te Asia. Bix cykˈonxa jun nkˈolbebla te María. Nim o tzˈakˈananxuj cyxola. Bix cykˈonxa jun nkˈolbebla te Andrónico bix te Junias. Te ntanema kej xjal lu, bix o chi tenxin tuj tzeeˈ wuyena. Bix t‑xel Cristoke bix nim o bint cyuˈnxin, bix ejeeˈxin nejl ocslal nwitza.

Cykˈonxa jun nkˈolbebla te hermano Amplias, jun wuyena. Bix cykˈonxa jun nkˈolbebla te Urbano. Kuya kiib tuya tuj taakˈen Cristo. Bix cykˈonxa jun nkˈolbebla te Estaquis, juntl wuyena. 10 Bix cykˈonxa jun nkˈolbebla te Apeles. Iyˈx qˈuixcˈaj tuˈnxin nuk tiˈj Cristo, pero min e cyaj tcyeˈyenxin tocslablxin. Bix cykˈonxa jun nkˈolbebla te cyej ocslal at tuj tja Aristóbulo. 11 Bix cykˈonxa jun nkˈolbebla te Herodión, juntl xjal te ntanema. Bix cykˈonxa jun nkˈolbebla te cyej ocslal at tuj tja Narciso. 12 Bix cykˈonxa jun nkˈolbebla te Trifena bix te Trifosa. Akˈanalkexuj tuj taakˈen Kaaw. Bix cykˈonxa jun nkˈolbebla te Persida, jun wuyena. Nim o tzˈakˈananxuj tuj taakˈen Kaaw. 13 Bix cykˈonxa jun nkˈolbebla te Rufo. Jun ocslal tbanelxix tnaabl. Bix cykˈonxa jun nkˈolbebla te ttxu Rufo. Jaxuj o cˈojlan te weya tisencˈa talxuj inayena. 14 Bix cykˈonxa jun nkˈolbebla te Asincrito, te Flegonte, te Hermas, te Petrobas, te Hermes, bix cykilca kej ocslal nchi chmet cyuyaxin tuˈn tjaw cynimsaˈn tbi Dios. 15 Bix cykˈonxa jun nkˈolbebla te Filólogo, bix te t‑xuˈlxin Julia tbixuj, bix te Nereo, bix te xuuj titzˈen Nereo, bix te Olimpas, bix te cyej ocslal nchi chmet cyuyaxin. 16 Bix juˈx cyxola, cykˈolben cyiiba tuya cykil cycˈuˈja.

Bix jax juˈx cykilca kej ocslal tiˈ Cristo tzalu, jax nxiˈ cykˈoˈn jun kˈolbebl te cyey.

17 Key hermano, il tiˈj tuˈn cycˈojlan cyiiba cywitz kej xjal cyxola ncub paˈnte cyey, cywitz kej nchi xnakˈtzan jun xnakˈtzbil yaaˈn junx taˈ tuyaj cyey o tzˈoc cyxnakˈtzaˈna tiˈj tyol Dios, tuˈntzen cytzpeta. Cypamel cyiiba cyiˈj, 18 cuma kej xjal lu yaaˈn t‑akˈanal Kaaw Cristo, sino nuk nchi xnakˈtzan alcyej baˈn cye tuj cywitz. Tuya yol jawnex pero ẍtakˈ, ncub cysbuˈn kej ocslal mintiiˈ tumel cyuya ka jaxxix chi yolen bix ka min. 19 Ntzkiˈna min o cheˈx lpey tiˈj jyaaˈn jaxxix, cuma nkˈumj tuj cykil twitz txˈotxˈ nchi niman cyey tyol Dios. Juˈ tzunj nchin tzalaja cyiˈja, pero waja tuˈn cycˈojlante cyiiba cywitz kej xjal cyaj tuˈn tbint kaˈ cyuˈna. Waja tuˈn tel cyniˈya tiˈj alcyej baˈn, pero ncyˈiya tuˈn tel cyniˈya tiˈj ti tten tuˈn tbint jkaˈ. 20 Amatzele tzint chi akˈanan kej lepchec tiˈ taaw il tuˈn tbaj cypaˈn ke ocslal, pero jax juˈx nakˈanan Dios tuˈn cytena tuj ttz̈yal. Oj tpon tumel, Dios cwel waˈbente tuj ajkelbil taaw il, bix cwel kˈoˈn tjakˈ cykena.

Jatzen cyey, tzajxit t‑xtalbil Kaaw Jesucristo cyibaja.

21 Timoteo nkˈon jun kˈolbebl cyey. Akˈanalxin wuyena tuj taakˈen Dios. Bix Lucio tuya Jasón bix Sosípater nchi kˈon jun kˈolbebl cyey. Te ntanemake.

22 Inayena, Tercio, jun tzˈiˈbel te Pablo, jax ma txiˈ nkˈoˈna jun kˈolbebl te cyey, cuma ocslal kena.

23 Nxiˈ tkˈoˈn Gayo jun kˈolbebl cyey. Tjaxin ntiiniya, bix tuj tjaxin nchi chmete ke ocslal tzalu te nimsalte tbi Dios. Jax juˈx Erasto nxiˈ tkˈoˈn jun kˈolbebl cyey. Jaxin cˈuˈl pwak tuj ja tnom lu. Bix nkˈon jxin Cuarto jun kˈolbebl cyey. Jaxin jun ocslal tzalu.

24 Bix weya, nchin kanena te Dios tuˈn ttzaj t‑xtalbil Kaaw Jesucristo cyibaj cykilcakey.

Tej tjaw tnimsaˈn Pablo tbi Dios

25 Mancˈbiltzen, chi xeˈl nkˈoˈna tuj tkˈab Dios. Nuk jaxin at tipemalxin tuˈn cycywixa tuˈntzen cytena jiquen tuj tyol Dios, jaj baˈn tpocbal tiˈj Jesucristo o txiˈ nkˈumena cyey. Jaj tpocbal tiˈ Cristo eˈwen taˈ jatxe ootxa, pero jaˈlewe yaaˈn eˈwentl taˈ. 26 Jaˈlewe lu nkbaja. Jxnakˈtzbil tiˈ Cristo o cyaj tzˈiˈbet cyuˈn kej kbalte tyol Dios. Jaj xin Dios mintiiˈ tbajlel e kbante tuˈn tbint jlu, tuˈntzen tkˈumj tuj cykilca twitz txˈotxˈ jxnakˈtzbil tiˈ Cristo, tuˈntzen cyniman ke xjal jtajbil Dios, jaj tuˈn cyocslan ti Cristo. 27 Oˈcx jun Dios at. Iynen tilbil tibaj cykilca te junx maj. Jawxit nimset tbixin tuˈn Jesucristo te junx maj. Juˈxit ttena.