Add parallel Print Page Options

Juˈj e xiˈ ttzˈiˈben Pablo cye ocslal tuj Roma

Kˈolbebl tuˈn Pablo cye ocslal tuj Roma

Key ocslal tuj Roma,

Inayena Pablo. Jun t‑akˈanal Jesucristo kena. Scyˈoˈn kena tuˈn Cristo te kbalte jbaˈn tyol Dios. Jtyol Dios tzin nkbaˈna tiˈj colbil ke jaxj e cyaj tkˈoˈn Dios cye kbalte tyol Dios nejl. Tzˈiˈben cyuˈn tuj tyol Dios jawnex. Jbaˈn tyol Dios lu nyolen tiˈj Tcwal Dios. Oc Tcwal Dios te xjal, bix tej titzˈjxin, ocxin te tiyˈjil David. Jatzen xjalja Kaaw Jesucristo. Pero amale oquet‑xin te xjal, pero Tcwal Dios texin. Jatztzen e chicˈajaxen tuya nim tipemal tej tjatz itzˈjxin tuj cyamecy juntl maj. Ja tzunxin e tzaj kˈonte waakˈena te weya tuˈn woca te t‑xelxin. Nchin kˈumena tyol Dios tuj cykilca tnom tuˈntzen t‑xiˈ cyniman xjal Dios tuˈnj n‑oc ke cycˈuˈj tiˈ Cristo. Bix cyxoltzen cykilca tnom cyuyax xsuna ejeeˈy te Roma. Cyuyaxa o chi oca te t‑xjal Jesucristo. Tetzen cyey, ejeeˈy ocslal te tnom Roma, nxaˈ ntzˈiˈbena ja wuˈja lu. N‑oc cyakˈa te Dios. Tuˈnxit t‑xtalbil Kman Dios bix Kaaw Jesucristo tzaaj cyibaja, bix tzajxit cykˈoˈnxin te cyey tuˈn cytena tuj ttz̈yal.

Tej tkbante Pablo tuˈn tpon kˈolbelte cye ocslal eteˈ tuj Roma

Tneelxix, cxeˈl nkbaˈna cyey nchin kˈona chjonte te Dios nuk tuˈn Jesucristo cyiˈja cykilcakey. Tuj cykilca twitz txˈotxˈ ma tzˈabij cyiw eteˈy tuj cyocslabla. Tuya cykil ncˈuˈja nchin ajbena te Dios tuˈnj nchin kˈumena jbaˈn tpocbal Tcwalxin. Bix ttzkiˈn Dios min chin weˈya nkaniya onbil cyey te Dios. 10 Jaca kˈij nchin kanena texin tuˈn ttzaj tkˈoˈnxin amleˈn weya tuˈn npona cyxola. Kape chˈix tpon tumel tuˈn tkˈontexin amleˈn wiˈja tuˈn npona cyuyey. 11 Wajxsen chin pon cyuyey, tuˈntzen tcyaj nkbaˈna cyey ti ma tkba Dios weya, tuˈntzen cycywixa mas tuj cyocslabla. 12 Pero yaaˈn nuk ejeeˈy chi cywixela mas tuj cyocslabla, sino jax juˈx weya ctzaal cynimsaˈna ncˈuˈja oj npona cyxola. Oj toc ncyeˈyena ka cyiw eteˈy tuj cyocslabla tiˈ Cristo, jatzen cyiwsabl ncˈuˈja, tisenxj oj toc cycyeˈyena inayena cyiw ntiiniya tuj wocslabla, jax juˈx cyey ccywixel cycˈuˈja. 13 Key hermano, waja cybiy chˈima maj e cub wuˈna tuˈn npona cyxola maa tuj Roma. Pero hasta jaˈlewe mix nchin poniya. E wajbeˈya tuˈn npona tuˈn nkˈumena tyol Dios cyey, tuˈntzen tajben cyey, tisen o bint wuˈna cyxol niyˈtl ocslal yaaˈn judío. 14 O tzaj tkbaˈn Dios weya tuˈn t‑xiˈ nkbaˈna te cykilca xjal j‑o tzaj tkbaˈn weya. Il tiˈj cxeˈl nkbaˈna cyej xjal griego bix cyej xjal yaaˈn griego, bix cyej xjal nmak xjal, bix cyej xjal ajnintzxse. 15 Juˈ tzunj nim nganiya tuˈn t‑xiˈ nkbaˈna baˈn tpocbal Cristo te cyey aj Roma, tisen o bint wuˈna cye niyˈtl xjal.

Jun tipemal tpocbal Cristo

16 Weya mintiiˈ nchˈixewa tuˈn t‑xiˈ nkbaˈna tpocbal Cristo, cuma tzin tyeecˈan jaja tipemal Dios. Te cyekej tzin cyocslaˈn, ejeeˈtzen chi cletel. Seyle judíoke oc cybiˈn jtpocbal ja yol lu nejl, bix seyle yaaˈn aj judíoke, pero ja yol lu at tajbel tuˈn cyclet. 17 Najben tpocbal Cristo, cuma tzin tkbaˈn ti tten tuˈn cyoc xjal jiquen twitz Dios. Oˈcx oj toc ke tcˈuˈj jun xjal tiˈ Cristo, jiquentzen taˈ twitz Dios. Tzin tkbaˈn tyol Dios cyjulu: “Jiquen taˈ jun xjal twitz Dios nuk oˈcx tuˈnj n‑oc ke tcˈuˈj tiˈ Dios,” tz̈i tyol Dios.

Cykil koˈ at tuˈn tcub kcastiwa

18 Yaltzen cyej xjal min tzˈoc cybiˈn bix nuk jaj kaˈ nbint cyuˈn, n‑el kniyˈ tiˈj ctzaal castiwa tuˈn Dios tuj cyaˈj cyibaj. Tuˈnj kaˈ nbint cyuˈn, ya mintl ncheˈx lpe tiˈ Dios jaxxix. 19 Yaaˈn tuˈnj min tzˈel cyniyˈ tiˈj, cuma o txiˈ tyeecˈan Dios cye ti tten. 20 Telniyˈ ti tten Dios, cuma jatxe tej tbaj tbinchaˈnxin twitz txˈotxˈ jatzen tyeecˈantexin nimxsen tipemalxin. Amale yaaˈnt chicˈajxin, n‑el cyniyˈ xjal tiˈj at‑xin. Oj n‑oc cycyeˈyen cykilca o bint tuˈnxin, n‑eltzen cyniyˈ tiˈj at Dios, bix at tipemalxin te junx maj. Juˈ tzunj mlay chi akˈtl xjal oj ttzaj tkˈoˈnxin cycastiwa tuˈnj el cyiiqˈuen jaxin. 21 Amale ot tzˈel cyniyˈ tiˈj at Dios, pero min o jaw cynimsaˈn tbixin. Min o txiˈ cykˈoˈn chjonte texin, sino o cyocsla juntl xnakˈtzbil yaaˈn jaxxix tiˈj ti tten tbinlen twitz txˈotxˈ. Tuˈnj o cheˈx lpeke tiˈj yol te tzpetsalcye, biˈx o cyaj ttzpetke tuˈn. 22 O chi kban ka n‑el cyniyˈ tiˈj, pero min o tzˈel cyniyˈ tiˈj. 23 Min o jaw cynimsaˈn tbi Jdios mintiiˈ tbajlel, sino nuk oˈcx cye xjal o jaw cynimsaˈn cyechel xjal bix cyechel chˈit bix cyechel lbaj bix cyechel mastl alimaj. O jaw cynimsaˈn ke xjal kej lu, pero cyimneke. 24 O cyaj cycolen Dios. Nuk kaˈ o cyajbe tuˈn tbint cyuˈn. Juˈ tzunj o chi cyaj tcyeˈyen Dios tuˈnx cyxiˈ lpe tiˈj kaˈ cyajbil. Bix tuj chˈixbajilxse o chi pone baj tuˈnj kaˈ o bint cyuˈn tuya cyxumlal. 25 Min o cheˈx lpeke tiˈ tyol Dios jaxxix, sino o cheˈx lpeke nuk tiˈj ẍtakˈbil yol. Min o jaw cynimsaˈn xjal tbi jxin Dios binchal cykilca, sino nuk oˈcx cye xjal o jaw cynimsaˈn kej tbinchbil Dios. Pero ja Dios tuˈn tnimj te junx maj. Juˈxit tzuna.

26 Cuma nuk ejeeˈj tbinchbil Dios o jaw cynimsaˈn, juˈ tzunj o chi cyaj tcyeˈyen Dios tuˈn cyxiˈ lpe tiˈj cyajbil te chˈixbajil. Tisen tzunkej xuuj, yaaˈntl nuk cye xinak o chi ajbeˈnake tisenx tten achbil, sino bix o chi jaw meltzˈaj xuuj cyuya xuuj. 27 Jax juˈx ke xinak, o cyaj cykˈoˈn cyachbil cyuya xuuj, tuˈntzen cyjaw meltzˈaj xinak cyuya xinak tuya nim cyachbil cyiˈj. Nimxsen chˈixbajil oj cyjaw maje xinak cyuya xinak. Cuma o cyaj cykˈoˈn Dios, ccyiikˈeltzen cycastiwa.

28 Kej o tzˈel cyiiqˈuen Dios, tuj cywitz yaaˈn il tiˈj tuˈn tel cyniyˈ tiˈ Dios. Juˈ tzunj o chi cyaj tcyeˈyen Dios tuˈn t‑xiˈ cyiiˈn cyex cyajbil yaaˈn baˈn, tuˈntzen tbint cyuˈn cykilca yaaˈn tuj tumel. 29 Nuk oˈcx jyaaˈn baˈn tuj twitz Dios nbint cyuˈn. Nuk lepchke tiˈ cykil kaˈ. Nuk n‑el cycˈuˈj tiˈj cye juntl. Nuk nchi yasen cyiˈ xjal. Nuk nchiˈl cycˈuˈj cyiˈ cabtl. Byol xjalke. Aj kˈojke. Sbul xjalke. Iicˈbel xjalke. Nuk nchi yolen kaˈ tiˈ cabtl. 30 Nuk nchi kˈumen cypaltel xjal cye cabtl. Iicˈbel Dioske. Nchi jaw cyakbil cyxol xjal. Mintiiˈ onbil cyaj. Nuk nbaj cyniman cyiib. Nuk nchi ximan tiˈ jun kaˈ tuˈn tbint cyuˈn. Min cybi tcawbil cyman. 31 Min tzˈel cyniyˈ tiˈj baˈn tuya kaˈ. Min nbint cyuˈn alcyej nxiˈ cykˈumen. Min tzˈoc cyakˈ ke te cyja cye. Ka at jun kˈoj, cycyˈi tuˈn tbaj tilel. Mintiiˈ tkˈakˈbil cycˈuˈj cyiˈ cabtl. 32 Tzin tkbaˈn tyol Dios cykil kej xjal nchi binchan kej kaˈ lu, ccyiikˈeltzen cycastiwa, jaj tuˈn cycyim. Amale n‑elet cyniyˈ tiˈj chi cymel tuˈnj kaˈ nbint cyuˈn, pero min chi weˈ tuˈn tbint mas il cyuˈn. Bix yaaˈn oˈcx nbint il cyuˈn, sino nchi jaw tzalaj oj nbint il cyuˈn cabtl.