Numeri 26

Beibl William Morgan

26 A bu, wedi’r pla, lefaru o’r Arglwydd wrth Moses, ac wrth Eleasar mab Aaron yr offeiriad, gan ddywedyd, ² Cymerwch nifer holl gynulleidfa meibion Israel, o fab ugain mlwydd ac uchod, trwy dŷ eu tadau, pob un a allo fyned i ryfel yn Israel. ³ A llefarodd Moses ac Eleasar yr offeiriad wrthynt yn rhosydd Moab, wrth yr Iorddonen, ar gyfer Jericho, gan ddywedyd ⁴ Rhifwch y bobl, o fab ugain mlwydd ac uchod; megis y gorchmynnodd yr Arglwydd wrth Moses, a meibion Israel, y rhai a ddaethant allan o dir yr Aifft.

⁵ Reuben, cyntaf‐anedig Israel. Meibion Reuben; o Hanoch, tylwyth yr Hanochiaid: o Phalu, tylwyth y Phaluiaid: ⁶ O Hesron, tylwyth yr Hesroniaid: o Carmi, tylwyth y Carmiaid. ⁷ Dyma dylwyth y Reubeniaid: a’u rhifedigion oedd dair mil a deugain a saith cant a deg ar hugain. ⁸ A meibion Phalu oedd Elïab. ⁹ A meibion Elïab; Nemuel, a Dathan, ac Abiram. Dyma y Dathan ac Abiram, rhai enwog yn y gynulleidfa, y rhai a ymgynenasant yn erbyn Moses ac yn erbyn Aaron yng nghynulleidfa Cora, pan ymgynenasant yn erbyn yr Arglwydd. ¹⁰ Ac agorodd y ddaear ei safn, ac a’u llyncodd hwynt, a Cora hefyd, pan fu farw y gynulleidfa, pan ddifaodd y tân ddengwr a deugain a dau cant: a hwy a aethant yn arwydd. ¹¹ Ond meibion Cora ni buant feirw.

¹² Meibion Simeon, wrth eu tylwythau. O Nemuel, tylwyth y Nemueliaid: o Jamin, tylwyth y Jaminiaid: o Jachin, tylwyth y Jachiniaid: ¹³ O Sera, tylwyth y Serahiaid: o Saul, tylwyth y Sauliaid. ¹⁴ Dyma dylwyth y Simeoniaid; dwy fil ar hugain a dau cant.

¹⁵ Meibion Gad, wrth eu tylwythau. O Seffon, tylwyth y Seffoniaid: o Haggi, tylwyth yr Haggiaid: o Suni, tylwyth y Suniaid: ¹⁶ O Osni, tylwyth yr Osniaid: o Eri, tylwyth yr Eriaid: ¹⁷ O Arod, tylwyth yr Arodiaid: o Areli, tylwyth yr Areliaid. ¹⁸ Dyma deuluoedd meibion Gad, dan eu rhif; deugain mil a phum cant.

¹⁹ Meibion Jwda oedd, Er ac Onan: a bu farw Er ac Onan yn nhir Canaan. ²⁰ A meibion Jwda, wrth eu teuluoedd. O Sela, tylwyth y Selaniaid: o Phares, tylwyth y Pharesiaid: o Sera, tylwyth y Serahiaid. ²¹ A meibion Phares oedd; o Hesron, tylwyth yr Hesroniaid: o Hamul, tylwyth yr Hamuliaid. ²² Dyma dylwyth Jwda, dan eu rhif; onid pedair mil pedwar ugain mil a phum cant.

²³ Meibion Issachar, wrth eu tylwythau oedd; o Tola, tylwyth y Tolaiaid: o Pua, tylwyth y Puhiaid: ²⁴ O Jasub, tylwyth y Jasubiaid: o Simron, tylwyth y Simroniaid. ²⁵ Dyma deuluoedd Issachar, dan eu rhif; pedair mil a thrigain mil a thri chant.

²⁶ Meibion Sabulon, wrth eu teuluoedd oedd; o Sered, tylwyth y Sardiaid: o Elon, tylwyth yr Eloniaid: o Jahleel, tylwyth y Jahleeliaid. ²⁷ Dyma deuluoedd y Sabuloniaid, dan eu rhif; trigain mil a phum cant.

²⁸ Meibion Joseff, wrth eu teuluoedd oedd; Manasse ac Effraim. ²⁹ Meibion Manasse oedd; o Machir, tylwyth y Machiriaid: a Machir a genhedlodd Gilead: o Gilead y mae tylwyth y Gileadiaid. ³⁰ Dyma feibion Gilead. O Jeeser, tylwyth Jeeseriaid: o Helec, tylwyth yr Heleciaid: ³¹ Ac o Asriel, tylwyth yr Asrieliaid: ac o Sechem, tylwyth y Sechemiaid: ³² Ac o Semida, tylwyth y Semidiaid: ac o Heffer, tylwyth yr Hefferiaid.

³³ A Salffaad mab Heffer nid oedd iddo feibion, ond merched: ac enwau merched Salffaad oedd, Mala, a Noa, Hogla, Milca, a Tirsa. ³⁴ Dyma dylwyth Manasse: a’u rhifedigion oedd ddeuddeng mil a deugain a saith cant.

³⁵ Dyma feibion Effraim, wrth eu teuluoedd. O Suthela, tylwyth y Sutheliaid; o Becher, tylwyth y Becheriaid: o Tahan, tylwyth y Tahaniaid. ³⁶ A dyma feibion Suthela: o Eran, tylwyth yr Eraniaid. ³⁷ Dyma dylwyth meibion Effraim, trwy eu rhifedigion; deuddeng mil ar hugain a phum cant. Dyma feibion Joseff, wrth eu teuluoedd.

³⁸ Meibion Benjamin, wrth eu teuluoedd oedd; o Bela, tylwyth y Belaiaid: o Asbel, tylwyth yr Asbeliaid: o Ahiram, tylwyth yr Ahiramiaid: ³⁹ O Seffuffam, tylwyth y Seffuffamiaid: o Huffam, tylwyth yr Huffamiaid. ⁴⁰ A meibion Bela oedd, Ard a Naaman: o Ard yr ydoedd tylwyth yr Ardiaid: o Naaman, tylwyth y Naamaniaid. ⁴¹ Dyma feibion Benjamin, yn ôl eu teuluoedd: dan eu rhif yr oeddynt yn bum mil a deugain a chwe chant.

⁴² Dyma feibion Dan, yn ôl eu teuluoedd. O Suham, tylwyth y Suhamiaid. Dyma dylwyth Dan, yn ôl eu teuluoedd. ⁴³ A holl dylwyth y Suhamiaid oedd, yn ôl eu rhifedigion, bedair mil a thrigain a phedwar cant.

⁴⁴ Meibion Aser, wrth eu teuluoedd, oedd; o Jimna, tylwyth y Jimniaid: o Jesui, tylwyth y Jesuiaid: o Bereia tylwyth y Bereiaid. ⁴⁵ O feibion Bereia, yr oedd; o Heber, tylwyth yr Heberiaid: o Malciel, tylwyth y Malcieliaid. ⁴⁶ Ac enw merch Aser ydoedd Sara. ⁴⁷ Dyma deuluoedd meibion Aser, yn ôl eu rhifedigion; tair mil ar ddeg a deugain a phedwar cant.

⁴⁸ Meibion Nafftali, wrth eu teuluoedd oedd; o Jahseel, tylwyth y Jahseeliaid: o Guni, tylwyth y Guniaid: ⁴⁹ O Jeser, tylwyth y Jeseriaid: o Silem, tylwyth y Silemiaid. ⁵⁰ Dyma dylwyth Nafftali, yn ôl eu teuluoedd, dan eu rhif; pum mil a deugain a phedwar cant. ⁵¹ Dyma rifedigion meibion Israel; chwe chan mil, a mil saith gant a deg ar hugain.

⁵² A llefarodd yr Arglwydd wrth Moses, gan ddywedyd, ⁵³ I’r rhai hyn y rhennir y tir yn etifeddiaeth, yn ôl rhifedi yr enwau. ⁵⁴ I lawer y chwanegi yr etifeddiaeth, ac i ychydig prinha yr etifeddiaeth: rhodder i bob un ei etifeddiaeth yn ôl ei rifedigion. ⁵⁵ Eto wrth goelbren y rhennir y tir: wrth enwau llwythau eu tadau yr etifeddant ⁵⁶ Wrth farn y coelbren y rhennir ei etifeddiaeth, rhwng llawer ac ychydig.

⁵⁷ A dyma rifedigion y Lefiaid, wrth eu teuluoedd. O Gerson, tylwyth y Gersoniaid: o Cohath, tylwyth y Cohathiaid: o Merari, tylwyth y Merariaid. ⁵⁸ Dyma dylwythau y Lefiaid. Tylwyth y Libniaid, tylwyth yr Hebroniaid, tylwyth y Mahliaid, tylwyth y Musiaid, tylwyth y Corathiaid: Cohath hefyd a genhedlodd Amram. ⁵⁹ Ac enw gwraig Amram oedd Jochebed, merch Lefi, yr hon a aned i Lefi yn yr Aifft: a hi a ddug i Amram, Aaron a Moses, a Miriam eu chwaer hwynt. ⁶⁰ A ganed i Aaron, Nadab ac Abihu, Eleasar ac Ithamar. ⁶¹ A bu farw Nadab ac Abihu, pan offrymasant dân dieithr gerbron yr Arglwydd. ⁶² A’u rhifedigion oedd dair mil ar hugain; sef pob gwryw o fab misyriad ac uchod: canys ni chyfrifwyd hwynt ymysg meibion Israel, am na roddwyd iddynt etifeddiaeth ymhlith meibion Israel.

⁶³ Dyma rifedigion Moses ac Eleasar yr offeiriad, y rhai a rifasant feibion Israel yn rhosydd Moab, wrth yr Iorddonen, ar gyfer Jericho. ⁶⁴ Ac yn y rhai hyn nid oedd un o rifedigion Moses ac Aaron yr offeiriad, pan rifasant feibion Israel yn anialwch Sinai. ⁶⁵ Canys dywedasai yr Arglwydd amdanynt, Gan farw y byddant feirw yn yr anialwch. Ac ni adawsid ohonynt un, ond Caleb mab Jeffunne, a Josua mab Nun.