Kawikaan 26

Ang Salita ng Dios (Tagalog Contemporary Bible)

26 Kung paanong hindi bagay na mag-nyebe sa tag-araw at umulan sa panahon ng tag-ani, hindi rin bagay na papurihan ang taong hangal.
² Ang sumpa ay hindi tatalab sa walang kasalanan. Tulad ito ng ibong hindi dumadapo at lilipad-lipad lamang.
³ Kailangan ang latigo para sa kabayo, bokado para sa asno, at pamalo para sa hangal na tao.
⁴ Huwag mong sagutin ang hangal kung nakikipag-usap siya sa iyo ng kahangalan, at baka matulad ka rin sa kanya.
⁵ Ngunit kung minsan, kailangang sagutin din siya, para malaman niya na hindi siya marunong tulad ng kanyang inaakala.
⁶ Kapag nagpadala ka ng mensahe sa pamamagitan ng isang mangmang, para mo na ring pinutol ang iyong mga paa, at para ka na ring gumawa ng sariling kapahamakan.
⁷ Ang pilay na paa ay walang kabuluhan, katulad ng kawikaan sa bibig ng hangal.
⁸ Ang isang papuri na sa hangal iniuukol ay parang batong nakatali sa tirador.
⁹ Ang kasabihang sinasabi ng hangal ay makapipinsala tulad ng matinik na kahoy na hawak ng lasing.
¹⁰ Kahangalan ang pumana ng kahit sino; gayon din ang pagkuha sa hangal o sa sinumang dumadaan upang upahan.
¹¹ Inuulit ng hangal ang kanyang kahangalan, tulad ng asong binabalikan ang kanyang suka para kainin.
¹² Mas mabuti pa ang hinaharap ng isang taong mangmang kaysa sa taong nagmamarunong.
¹³ Ang batugan ay hindi lumalabas ng tahanan, ang kanyang dahilan ay may leon sa lansangan.
¹⁴ Gaya ng pintuang pumipihit sa bisagra ang batugan na papihit-pihit sa kanyang kama.
¹⁵ May mga taong sobrang tamad na kahit ang kumain ay kinatatamaran.
¹⁶ Ang akala ng batugan mas marunong pa siya kaysa sa pitong tao na tamang mangatuwiran.
¹⁷ Mapanganib ang nanghihimasok sa gulo ng may gulo, ito ay tulad ng pagdakma sa tainga ng aso.
^18-19 Ang taong nandaraya sa kanyang kapwa, at saka sasabihing nagbibiro lang siya ay tulad ng isang baliw na pumapana sa mga tao sa pamamagitan ng nakamamatay na palaso.
²⁰ Namamatay ang apoy kung ubos na ang panggatong, natitigil ang away kung wala ng tsismisan.
²¹ Kung uling ang nagpapabaga at kahoy ang nagpapaliyab ng apoy, ang taong palaaway naman ang nagpapasimula ng gulo.
²² Ang tsismis ay parang pagkaing masarap nguyain at lunukin.
²³ Maaaring itago ng magandang pananalita ang masamang isipan, tulad nito ay mumurahing banga na pininturahan ng pilak.
²⁴ Maaaring ang kaaway ay magandang magsalita, ngunit ang nasa isip niya ay makapandaya.
²⁵ Kahit masarap pakinggan ang kanyang pananalita ay huwag kang maniwala, sapagkat ang iniisip niya ay napakasama.
²⁶ Maaaring ang galit ay kanyang maitago, ngunit malalantad din sa karamihan ang masama niyang gawa.
²⁷ Ang humuhukay ng patibong para mahulog ang iba ay siya rin ang mahuhulog doon. Ang nagpapagulong ng malaking bato para magulungan ang iba ay siya rin ang magugulungan nito.
²⁸ Ang sinungaling ay nagagalit sa nabiktima niya ng kasinungalingan, at ang taong nambobola ay ipapahamak ka.