Efeesa 5

Reimer 2001

5 Doaromm, aus Gott siene Kjinja, straeft doano am aenlich to woare;

² en waundelt enne Leew, soo aus Christus junt uk haft leef jehaut, en jeef sikj selfst han aus en Opfa en Schlachtopfa fa en seeta Jeroch.

³ Oba lot kjeene Raed mank ju senne fonn Huararie, en aule Onnreinichkjet oda Jiets, soo auset dee Heilje tookjemt.

⁴ Uk kjeene schwiensche oda noarhauftje Raed, oda Spotte, dan soont es nich aunjenaem. Siet leewa dankboa.

⁵ Dan dit sel jie weete, daut kjeena dee Huararie drift, oda en Onnreina, oda jietsja, dee en Jetsedeena es, woat aun Christus en Gott sien Rikj en Oawgoot ha.

⁶ Lot kjeena junt fefeare met ladje Wead, dan waejen soone Dinje kjemt Gott sien Oaja opp dee onnjehuarsaume Kjinje.

⁷ Doaromm siet nich Metdeela met an;

⁸ dan jie weare donn enn Diestanes, oba nu se jie Licht em Herr, waundelt soo aus Lichtkjinja,

⁹ - dan daut Licht bringt Frucht daut enn aulet Goodet, en Jerachtichkjet en Woarhweit es, -

¹⁰ en prooft to bewiese waut daem Herr goot jefelt.

¹¹ En hat nich Jemeenschofft met dee onnfruchtboare Diestanesswoakje, moakt dee leewa oppenboa.

¹² Dan daut es ne Schaund sogoa doafonn to raede waut dee em jeheeme doone.

¹³ Oba aules, waut opjedakjt woat, woat derch daut Licht jeoppenboat.

¹⁴ Dan aules daut Oppenboa es, es Licht. Doaromm sajcht hee: "Wakj opp, dee du schlapst, en sto opp fonn mank dee Doodes, dan woat Christus die Licht jaewe."

¹⁵ Seet junt dan faea, woo jie oppsechtich waundle, nich soo aus soone dee nich Kluak sent, oba soone dee Kluak sent.

¹⁶ Nutst dee Tiet ut, dan dee Doag sent Bees.

¹⁷ Doaromm siet nich domm, leewa festot waut daem Herr sien Wele es.

¹⁸ En besuept junt nich met Wien, duat Aewadriewness bringt, oba woat jefelt met daem Heilje Jeist;

¹⁹ en raet unjarenaunda met Psalme en Kjoake Leeda en jeistliche Leeda, singt en spaelt metem Hoat tom Herr;

²⁰ en dankt Gott daem Foda emma fa aules, enn onns Herr Jesus Christus sien Nome;

²¹ en siet eena daem aundra unjadon enn Christus siene Forcht;

²² en de Fruehes aun aeare eajne Mana soo aus tom Herr.

²³ Dan dee Maun es dee Fru aea Haupt, soo aus Christus daut Haupt es aewa dee Jemeent, en selfst dee Heilant es fa dee Kjarpa.

²⁴ Oba soo aus dee Jemeent Christus unjadon es, soo sulle dee Fruehes senne to aeare Mana enn aules.

²⁵ Jie Mana, hat june Fruehes leef, soo aus Christus dee Jemeent leef haud, en sikj selfst doafaea han jeef,

²⁶ daut hee dee mucht Heilich moake derch daut wausche met Wota em Wuat,

²⁷ soo daut hee dee Jemeent mucht to sikj selfst feharlicht faeastale, dee nich plackich, oda fekjneddet es, oda irjend soowaut derhaea, oba daut dee sull heilich en oone faeale senne.

²⁸ Soo sulle Mana uk aeare Fruehes leef ha aus aera eajna Kjarpa. Waea siene eajne Fru leef haft, haft sikj selfst uk leef;

²⁹ dan kjeena haft jeemols sien eajnet Fleesch jehaust, oba hee jeft daut Noarunk, en fesorcht doafaea, soo aus Christus uk fa siene Jemeent,

³⁰ dan wie sent Jlieda aun sien Lief.

³¹ Doaromm woat en Maun siene Foda en siene Mutta felote, en woat siene Fru aunhenje, en dee twee woare een Fleesch senne.

³² Dit es en grootet Jeheemnes, oba ekj raed fonn Christus, en fonne Jemeent.

³³ Aulamol, lot en jieda siene eajne Fru so leef aus sikj selfst, en dee Fru saul aea Maun huach achte.