Ebrayujmet 12

Ne Bibliaj Tik Nawat

12 Kiane tel, techyawaluat sujsul miak tay kilwitiat ka ijkiuni. Yajika tiktamutakan wejka muchi ne kijkimil wan ne tateyekchijtuk ne techkakasua, wan iwan tanejmachselilis timutalukan tik ne ujti tikpiat tuishpan. ² Tikitakan ne ká iwan pewa wan tami ne tayulmatilis, Yeshu. Yajane, ipal ne pakilis nemi iishpan, kiejekuj ne cruz. Inte ishpinawak. Wan nemi muetztuk ka imayekkan ne ikuijpal ne Teut. ³ Shikishkejketzakan yajuni ká kiselij muchi uni najnankilis ipal ne tateyekchiwat ne kijilwiat, wan maka shikujkutiakan, wan ma inte majmatamikan anmuyujyulu. ⁴ Inteuk anmusuntiwit iwan ne tateyekchijtuk hasta ma shitemakakan anmuesyu.

⁵ Anka ankielkawtiwit ken metzinnutza ken se kinnutza ne ipilawan:

⁷ Shikselikan ne tiskalilis ne metzinmaka ne Teut ken anhipilawan, ika katiawel ne kunet ká ne iteku inte kimaka? ⁸ Asu inte metzinwitektiwit ken muchiwa iwan muchi, kiane anmejemet tepal kukunet wan tesu ipilawan yekkaya. ⁹ Neman, tikpishtiwit tutejteku ipal tuweyka wan tiktakamatket melka techmakaket: keski mas tiawit timutaliat itan itatuktilis ne teteku ipal ne tuijiu wan tiawit tiyujyultuk? ¹⁰ Yejemet techmakaket ken kikejketzket yek ankakeski tunal; yaja techmakatuk pal techpalewia tikejekuat ne iteukayu. ¹¹ Kwak techiskaliat, inte keman muita ka yaja pal tipakit kwak kichiwat, asunte pal techkukua; melka uni, tipan kinmaka nejmachnemilis ne ijkiuni muejekujtiwit wan ne itakil tamelakchiwalis.

¹² Yajika, shikmelawakan ne anmumejmey wijwilantuk wan ne anmutejtewajka ne inte mijkwanit, ¹³ wan shikchiwakan ujujti melawak ipal anmujmukshi, pal te muishkwepa ne metzkelu, mas yek ma mupajti.

¹⁴ Shiktemukan nejmachnemilis iwan muchi, wan ne tateuchiwalis: inte aka kitas ne Tajtzin asu inte kipia; ¹⁵ wan shikpachiwi ma inte aka kichiwa faltar ne itetasujtalis ne Teut, pal te takati ikajku wan metzkakasua nian se inelwayu chichikayu wan ipanpa miak yawit mususulwiat; ¹⁶ nian se tatzinhejenchiwani o sé ká kichiwa tay inte muneki ken Esaw, ká ipatka chiupi takwal temakak ne iachtupunilis. ¹⁷ Ika ankimatit ka tipan, kwak kinekituya kipia ne teteuchiwalis, inte welik, ika inte kiajsik kan muyulpataskia melka kitajtan wan chukak sujsul.

¹⁸ Ika inte anhajsitiwit hasta ne kan muchijchimi wan mutatijtuk iwan tit wan takumia wan takunyua wan tapayawi, ¹⁹ wan tzalani se trompetaj wan mukakket pajpalabraj, wan ne kikakket kinekiket ma intea kinhilwikan tatka, ²⁰ ika inte kiseliat ne tay mutuktijtuya:

²¹ Wan sujsul tamujmutia tay ne kiski iishpan Moshe, hasta yaja inak:

²² Melka uni, anhajsitiwit ka Tziontepet, wan itechan ne Teut yultuk Yerushalem ipal ne ilwikak ka ikajku, wan sujsul miak tanawatiani musenputzujtiwit, ²³ wan ne sennemit ipal ne ajachtupunijtuk ne mupujtiwit tik ne ilwikak, wan ne Teut ne juez ipal muchi, wan inhijijiu yejyek yejyekajtuk, ²⁴ wan Yeshu ne tajkutaketzani ipal ne yankwik sentaketzat, wan ne esti shinijtuk ne tanutza mas yek que ne tay ipal Habel.

²⁵ Shiktalikan cuidadoj ma shikakikan ne tanutza. Ika asu inte weliket chuluat yejemet ká inte kikakket ne kinhilwijket ijpak ne taltikpak, keski mas tejemet inte welisket tichuluat asu inte tikakit yajane ká technutza tik ne ilwikak. ²⁶ Yaja kitzejtzeluj ne taltikpak kwakuni; ashkan inatuk ka:

²⁷ Wan "ukseujti" kineki ina ka kishtis ne tzejtzelujtuk (yaja ken tinaskiat ne tay muchijtuk) ma naka ne tay inte weli mutzejtzelua. ²⁸ Neka tejemet tikajsit se tatekimakalis inte mutzejtzelua. Tinakan tashtawi yajika, wan titekitikan ken ajwiak ipal ne Teut, iwan tetakamatilis wan pinawalis, ²⁹ ika ne tuTeut nusan se tit tawilewani.