2 Korinto 10

Ne Bibliaj Tik Nawat

10 Najasan, Pawlo, iwan wey iyulyamanikayu ne Mawaltijtuk nimetzintajtani, naja ká melka nikanawak kwak ninemi anmuishpan nichikawaya nimetzinnutza kwak te ninemi anmuwan, ² ashan kwak teuk ninemi, nimetzintajtani ma te niaw nimuneki nichikawaya kenha ken nikishketza ka nikchiwa iwan ne techijilwiat ka timuwikat ken tunakayu. ³ Melka ijkia tinejnemit tik tunakayu, tesu timusumat ken kichiwat ne muwikat ken innakayu.

⁴ Ika ne tajtaiwan ipal ne tutasumalis tesu ipal tuweyka sute kipiat intajpal ipanpa Teut. Ne tutajtaiwan welit kitajkalit cajcastilloj, welit nankiliat tajtaika, ⁵ welit kitemultiat muchi wejkapan tay kitejtenewa ne taishmatilis ipal Teut, welit kikwit tik tailpilis muchi yultaketzalis pal kitakamati ne Mawaltijtuk, ⁶ wan techajshitia pal tiktzunkwit muchi ká te tetakamatit kwak yekawi ne anmutetakamatilis.

⁷ Ankitat ne nemi anmuishpan. Su aka kimati ka yaja ipal ne Mawaltijtuk, ma kishkejketza ini, ka ijkiunisan ken yaja ipal ne Mawaltijtuk, tejemet nusan kiane. ⁸ Wan melka nimuweymati sea ipanpa ne tutatuktilis ne techmakatuk ne Tajtzin pal timetzinhiskaliat wan tesu pal timetzintajkalit, te niaw nishpinawa. ⁹ Ma te aka kikejketza ken su nimetzinmutiskia iwan ne tajtajkwilul, ¹⁰ ika inat: melka ne ajamat ejetek wan tajtajpaltik, kwak walajsi kukuya iweyka; kwak taketza te tatka ipatiw! ¹¹ Ma se ijkiuni kishketza ini, ka ken titajkwiluat ijtik ajamat kwak te tinemit, ijkiuni titekitit kwak tiajsit.

¹² Tejemet te timukejketzat ken ankakeski tukniwan ká inat insel ka yejemet yejyek, nian timusenpepetat inwan; yejemet mutamachiwat ijtik yejemet wan musenpepetat ne sejse iwan ne sejseuk wan te kimatit tatka.

¹³ Tejemet te timuweymatit iwan se tamachijka ne te tupal, sute iwan ne tamachijka ipal ne tajshitilis ne techmakak ne Teut, se tamachijka pal tiejkut hasta anmejemet. ¹⁴ Te timukujkutilanat sujsul ken te tiejkuskiat anmutech, ika tiajsitiwita anmutech titamakat ne iyeknawatilis ne Mawaltijtuk. ¹⁵ Te timuweymatit iwan se tamachijka ne semaya yek ipal tepal tejtekit. Tejemet tikpiat tejchialis ka kwak weya ne anmutayulmatilis, tiawit timuchiwat sujsul wejwey anmupanpa ken ne tutajshitilis, ¹⁶ pal titayeknawatiat tik talmet mas wejka; tesu pal timuweymatit iwan tepal tajshitilis ne nemia.

¹⁸ Ika tesu muita yek yajuni ká kineki tailwitia ka yaja yek sute ká ne Tajtzin ina ka yek.