1 Yojan 3

Ne Bibliaj Tik Nawat

3 Shikitakan keski techtasujta ne Tuteku, ma timunutzakan ikukunew Teut, wan kiane. Yajika ne taltikpak inte techishmati, ika inte kishmatki Yajane.

² Yejyektasujtatuk, ashkan tiikukunew Teut wan teuk muneshtijtuk tay tiawit timuchiwat. Tikmatit ka asu walmuneshtia, tiawit kenhat ken yaja, ika tiawit tikitat ken nemi. ³ Wan muchi ne takamet ne kipiat ini tejchialis ijtik yaja mupupuat, ijkiunisan ken yaja.

⁴ Muchi ká kichijtiwit tay inte yek nusan kichijtiwit tay inte tinemit pal tikchiwat, wan ne tateyekchijtuk ne tay inte nemi pal muchiwa; ⁵ wan ankimatit ka yajuni walmuneshtij pal kishtia ne tateyekchijtuk, wan te nemi nian se tateyekchijtuk ijtik yajasan. ⁶ Muchi ká nakat ijtik yaja inte tateyekchiwat; muchi ká tateyekchiwat inte kitztiwit nian kishmattiwit.

⁷ Kukunetzitzin, ma inte mushijshiku aka: yek ne ká kichiwa tay yek, kenha ken yajane yek; ⁸ ne ká kichiwa tay teyek, yaja kiski itech ne Tamintuk, ika ne Tamintuk tateyekchijkia kwak pejki muchi. Yajika walmuneshtij ne Itelpuch ne Teut, pal yaja yawi kitajkali ne itekiw ne Tamintuk. ⁹ Muchi ká nestiwit itech ne Teut inte kichiwat tay teyek, ika naka ijtik yejemet ne ishinach ne Teut, wan te welit tateyekchiwat ika nestiwit itech ne Teut. ¹⁰ Ijkini muita ká ne ikukunew ne Teut wan ká ne ikukunew ne Tamintuk: muchi ká inte kichiwat tay yek inte kistiwit itech Teut, wan ne inte kitasujtat ne iiknew nusan inte.

¹¹ Ika ini ne tanawatilis ne ankikakket kwak pejki muchi: ma shimutasujtakan, ¹² inte ken Kain, ká kiski itech ne teyek wan kimiktij ne iikaw; wan taika kimiktij? Ika inte yejyek ne itejtekiw, wan yek ne itekiw ne iikaw.

¹³ Wan maka shishpuyawikan, nukniwan, su ne taltikpak metzinhishijia. ¹⁴ Tejemet tikmatit ka intea tiawit timikit, tiawit tiyujyultuk, ika tiktasujtat ne tukniwan; ká ne inte kitasujta naka tik ne mikilis. ¹⁵ Muchi ká kishijiat ne iiknew takamiktianimet, wan ankimatit ka muchi ne takamiktianimet inte kipiat ijtik yejemet pal yawit yujyultuk senpa. ¹⁶ Welit tikishmatit kienej ne tetasujtalis, ika yajuni tupanpa temakak ne ialmaj wan tinemit pal tikchiwat kenha ipal ne tukniwan. ¹⁷ Ká ne kipia pal mutekipanua tik ne taltikpak wan tachia wan kita ka ne iiknew muneki wan te kikukua ipanpa ne iiknew, ken yawi naka ijtik yaja ne itetasujtalis ne Teut?

¹⁸ Kukunetzitzin, inte tiktasujtakan tukniwan sema iwan ne palabraj nian ne tunenepil asunte iwan tutekiw wan ma tejkia.

¹⁹ Wan san tikmatisket ka tejemet tiipal ne tejkia wan talnamikisket tik tuyulu ²⁰ ika asu techajwa tuyulu, ne Teut mas wey que ne tuyujyulu wan muchi kimati. ²¹ Tajtasujtatuk: asu ne tuyulu inte techajwa, inte timunekit timajmawit itech ne Teut, ²² wan tay ne tiktajtanit, tikwit itech imey, ika tejemet titajpiat ne tay techtuktij wan tikchiwat ne tay yek tik itachialis.

²³ Wan ini tay yaja techtuktia: ma tikyulmatikan ne ikunew Yeshu Mawaltijtuk wan ma timutasujtakan ijkiunisan ken yaja techtuktijtuk, ²⁴ wan ká ne tajpia tay tatuktijtuk, yajuni ijtik Yaja naka, wan Yaja ijtik yajuni, wan tikishmatit ka Yaja naka ijtik tejemet ika Yaja techmakak ne Ijiutzin.