1 Timoteo 2

Ne Bibliaj Tik Nawat

Ken nemi pal muwika ne Sennemit

2 Achtu tel nitajtani ma muchi mutajtawelikan, ma kitajtanikan ne Teut, ma kilwikan panpadiush, ka inmaku muchi ne takamet: ² ka inmaku tatuktianimet wan muchi ká wejwey, ma tiwelikan tinejmachnemit wan tinemit yek wan tiyujyultuk yek. ³ Uni kita yek wan ken muneki ne Teut tutamakishtiani, ⁴ ká kineki ma mupalewikan muchi ne takamet wan ma ajsikan kishmatit ne tejkia; ⁵ ika Teut nemi sesan wan sanse tajkutaketzani itzalan Teut wan takamet: se takat, ne Mawaltijtuk Yeshu, ⁶ ne mutemakak ipatka muchi, ken yawi inat kwak ajsi ne tunal. ⁷ Wan naja yajika nechtalijtuk ken tanawatiani wan titanijtuk. Nina tay tejkia, tesu nina sanka. Nitamachtiani ipal tejtechan ijtik tayulmatilis wan tejkia.

⁸ Yajika, nikneki ma kitajtanikan ne Teut nujme, ma kiajkukikan inmejmey chipawak wan ma te aka kwalani wan ma te aka mutajtanili. ⁹ Wan kenha, ma muekchiwakan siwatket nusan iwan inkwajkwach ken muneki, iwan pinawalis wan tamatilis, tesu iwan tajtajkwil wan tumin wan kujkusti wan ikwajkwach wey ipatiw, ¹⁰ sute ken munekit siwatket ká inat ka kitasujtat ne Teut: iwan intekiw yektzin.

¹¹ Ne siwat ma mumachti takaktuk wan iwan tetakamatilis. ¹² Se siwat te nikajkawa tamachtia nian kituktia se takat, sute ma nemi takaktuk. ¹³ Ika achtu muchijki Adam, tipan Jawa, ¹⁴ wan Adam te mushijshikuj: mushijshikuj ne siwat wan kichijki tay te yek. ¹⁵ Yawi mupalewia ika tapunia, asu nakat iwan tayulmatilis wan tetasujtalis wan tateuchiwalis ken muneki.