1 Korinto 14

Ne Bibliaj Tik Nawat

Ne tajtaketzalis wan ne teutaketzalis

14 Shumet iipan ne tetasujtalis. Shiktemukan tay ipal tuijiu. Sea yek ma shitaketzakan ipal Teut, ² ika ká ne tanutza tik se taketzalis tesu kinutza takamet sute Teut; te aka kikaki, ina ijichtaka itech ne iijiu. ³ Ne taketza ipal Teut kinnutza takamet pal muskaliat wan mupalewiat wan yulchikawayat.

⁴ Ne ká tanutza tik se taketzalis isel muskalia; ne ká taketza ipal Teut kiskalia ne sennemit. ⁵ Yek ma shitanutzakan muchi tik tajtaketzalis; nikneki mas ma shitaketzakan ipal Teut. Ne teutaketzani mas wey que ne tanutza tik tajtaketzalis su yajini te kinhilwia sejseuk tay kineki ina pal kiane muskalia ne sennemit.

⁶ Ashan nukniwan, su ajsi anmutech se tanutza tik tajtaketzalis, ken yawi metzinpalewia su te metzinnutza pal metzinneshtilia, o pal ankishmatit, o teutaketza o metzinmachtia? ⁷ Nusan ne tay te yultuk wan tzalani ken se pitujchin wan se guitarraj, su te niktzutzuna pal tiwelit tikishmatit ne nojnotaj, ken yawi kimati se tay niktzutzuna o tay nikpitza? ⁸ Wan su niktzutzuna se trompetaj ken te mukaki tay niktzutzuna, ká yawi kikwi ajarmaj pal musuma? ⁹ Ijkiunisan, su anmejemet nusan te antaketzat iwan ne taketzalis ne muneki pal muchi kimatit, ken yawi kimati se tay antanutzat? Antanutzasket ipal ne ejekat!

¹⁰ Tinakan ka sujsul mijmiak te kenhat ne ikupak pak ne taltikpak, wan muchi kipiat inpatiw. ¹¹ Yajika, su te nikmati tay kineki ina ne ikupak, naja nimele ipal ne tanutza wan mele ne tanutza nupal. ¹² Ijkiuni anmejemet nusan, ká kitemuat tay ipal ne iijiu pal muskalia ne sennemit, shimutatemuilikan ma wey anmupatiw. ¹³ Yajika, su se tanutza tik se taketzalis, ma kitajtani ne Teut ma weli ina tay kineki ina.

¹⁴ Su niknujnutza ne Teut tik se taketzalis, ne nuijiu kinutza; ne nutamatilis te kichiwa tatka. ¹⁵ Yajika tel, niaw niknujnutza ne Teut iwan ne nuijiu, niaw niknujnutza iwan ne nutamatilis nusan. Niaw nitakwika iwan ne nuijiu, niaw nitakwika iwan ne nutamatilis nusan. ¹⁶ Su te, kwak tiaw titateuchiwa iwan ne muijiu, ne nemi kan muajsit ne melemet ken weli ina amen kwak tami tina panpadiush, su yaja te kimati tay tina? ¹⁷ Melka yek ken taja tina panpadiush, ne seuk te muskalia. ¹⁸ Melka ne Teut kichijki ka weli nitanutza tik tajtaketzalis mas que muchi anmejemet, ¹⁹ tik ne sennemit niknekiskia nitanutza makwil palabraj iwan ne nutamatilis pal nikinmachtia sejseuk, wan te sujsul miak palabraj tik se taketzalis.

²⁰ Nukniwan, maka shimuchiwakan ken kunetzitzin tik ne anmutamatilis, sute ipal ne tay teyek shimuchiwakan sujsulin, tik ne anmutamatilis shimuchiwakan wejweymet. ²¹ Tik ne tajtuli muijkwilujtuk:

²² Ne tajtaketzalis nemit pal muishmati, tesu ipal ne tayulmatit sute ipal ne te tayulmatit; ne teutaketzalis te nemi ipal ne te tayulmatit sute ipal ne tayulmatit. ²³ Yajika su musentepewa muchi ne sennemit kan nemi wan muchi tanutzat tik tajtaketzalis, wan kalakit melemet wan sejse te tayulmatit, anka te yawit inat ka antzujtzunhejekat? ²⁴ Pero su muchi taketzat ipal Teut wan kalaki se te tayulmati o se mele, muchi yawit kiajajwat, muchi yawit kitajtaniliat; ²⁵ tay ne minashtuk tik ne iyulu yawi muneshtia, wan ijkiuni yawi mutamuta talchi, yawi mutankwaketza iishpan ne Teut wan yawi ina ka tejkia ka ne Teut nemi ijtik anmejemet.

²⁶ Yajika tel, nukniwan, kwak anmusentepewat, sejse kipia se salmoj, kipia se tamachtilis, kipia se taneshtilis, kipia se taketzalis, kipia se tapatalis: ma muchi muchiwa pal tiskalia.

²⁷ Su tanutzat tik tajtaketzalis, ma kichiwakan semaya ume wan anka yey, tesu mas, wan sejse ika, wan ma ina ajaka tay kineki ina. ²⁸ Su te aka kimati tay kineki ina, ma takaktuk tik ne sennemit; ma tanutza ipal yaja isel wan ipal ne Teut.

²⁹ Ma tanutzakan ume o yey teutaketzani wan ma taishtemukan ne sejseuk. ³⁰ Su muneshtilia seuk ká nemi né, ma mukawa ne achtu, ³¹ ika muchi anwelit taketzat sejse ika pal muchi mumachtiat wan muchi mupalewiat, ³² wan taketzanimet kintuktiat inhijijiu taketzanimet, ³³ ika ne Teut tesu se Teut ipal kumunilis sute ipal nejmachnemilis.

Ken tik muchi ne sejsennemit ipal ne tayulmatit, ³⁴ ne siwatket tik ne sejsennemit ma tajtakaktuk, ika te kinhajkawat tanutzat; ma tetakamatikan ijkiunisan ken ina ne tajtuli. ³⁵ Su se siwat kineki mumachtia se, ma kitajtanili ne ishulejyu ka ichan, ika nemi pal tishpinawat su se kinutza se siwat tik ne sennemit.

³⁶ Anka anmutech kistuk ne ipalabraj ne Teut? Anka sema anmutech walajsituk? ³⁷ Su se ina ka yaja teutaketzani o ka kipia Ijiutzin, ma kishkejketza tay ne nimetzinhilwia tik ini tajkwilul, ika ne Tajtzin tatuktij. ³⁸ Su aka te kishmati, ma te kishmatikan.

³⁹ Yajika nukniwan, shiktemukan ma shiteutaketzakan wan su sejse tanutzat tik tajtaketzalis maka shinakan ka te weli. ⁴⁰ Ma muchiwa muchi ken yek wan ken muneki.