1 Korinto 1

Ne Bibliaj Tik Nawat

1 Naja, Pawlo, ne nutztuk pal nimuchiwa ititanijtuk ne Mawaltijtuk Yeshu ipanpa itaelewilis Teut, wan ne tuiknew Sostenes, ² tiktuktiat ini tajkwilul itech ne sennemit tik Korinto, itech ne teujteuchijtuk tik ne Mawaltijtuk Yeshu, nujnutztuk pal tayulmatit, iwan muchi ne kinutzat ne itukay ne tutajtzin Yeshu Mawaltijtuk nujme, ijtik yejemet wan ijtik tejemet: ³ ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.

⁴ Senpa nikilwia ne Teut panpadiush anmupanpa ika ne Mawaltijtuk Yeshu metzinmakatuk ne itetasujtalis ne Teut, ⁵ pal kiane yaja yawi metzintepewilia muchi tik pajpalabraj wan tik tamatilis, ⁶ ijkiunisan ken tay ne inak wan kichijki ne Mawaltijtuk muilwitijtuk ka tejkia ijtik anmejemet. ⁷ Kiane, anmejemet inte metzinchiwa faltaj nian se tetakulis pal ma shikchiakan ne taneshtilis ipal tutajtzin Yeshu Mawaltijtuk. ⁸ Wan yaja inas ka anyejyek nian ankichijtiwit tatka tay teyek hasta ma tami muchi tik ne tunal ipal ne tutajtzin ne Mawaltijtuk Yeshu. ⁹ Yek ne Teut! Yajaya metzinnutztuk ma shisennemikan iwan ne ikunew Yeshu Mawaltijtuk, ne tutajtzin.

Ne sesankayu ipal ne sennemit itan Yeshu

¹⁰ Nimetzintajtani, nukniwan, ipanpa ne itukay ne tutajtzin Yeshu Mawaltijtuk, ma shinakan muchi kenha wan ma te shitzayanikan; ma shinakakan pijpiktuk ken sesan tik ne tay anmejemet yultaketzat wan inat.

¹¹ Nukniwan, ne chanejket ipal ne ikal Kloe nechneshtilijtiwit ka anmusumat anmutzalan. ¹² Nina uni ika sejse anmejemet ina: "Naja niipal Pawlo", "Naja niipal Apolos", "Naja niipal Kepas", "Naja niipal ne Mawaltijtuk". ¹³ Anka mutajkutijtuk ne Mawaltijtuk? Anka Pawlo mucruzpiluj anmumaku? Anka anmumakaket ulyuj tik itukay Pawlo? ¹⁴ Nikilwia ne Teut panpadiush ka te nikmakak ulyuj nian se anmejemet, semaya Crispus wan Gaius, ¹⁵ ma te aka weli ina ka anmumakaket ulyuj tik nutukay! ¹⁶ Nusan nikmakak ulyuj ne chanejket ipal ne ikal Estepanas. Te nikmati su nikmakak seuk ulyuj.

¹⁷ Ika ne Mawaltijtuk te nechtitanij pal nitamaka ulyuj sute pal nitayeknawatia; te tik itamatilis palabraj, pal te mukwepa te tatka ipatiw ne icruz ne Mawaltijtuk.

¹⁸ Ne palabraj ipal ne cruz, ipal ne puliwit yaja chachalakalis, wan tupal ne timupalewiat yaja itajpal Teut, ¹⁹ ika muijkwilujtuk:

²⁰ Kan nemi ne kimati wey? Kan ne tajkwiluani? Kan ne tajtani wey ipanpa ini taltikpak? Anka ne Teut te kilwitijtuk ka chachalakalis ne tamatilis ipal ne taltikpak? ²¹ Ika, ipanpa ne itamatilis ne Teut ne taltikpak te kishmatki ne Teut iwan tamatilis, kitak yek ne Teut ma kipalewi ne tayulmatit iwan ne chachalakalis ipal ne tanajnawatilis. ²² Ika ne Yudayujmet tajtanit se pal muishmati wan ne Greciajtakamet kitemuat tamatilis. ²³ Tejemet titanajnawatiat ne Mawaltijtuk cruzpilujtuk: ipal ne Yudayujmet tatzunchaluas, ipal ne tejtechan chachalakalis; ²⁴ ipal ne nujnutztuk Yudayujmet wan Greciajtakamet, ne Mawaltijtuk itajpal ne Teut wan itamatilis ne Teut. ²⁵ Ika ne tzuntet ipal ne Teut kimati mas que ne takamet, wan ne kukuyanit ipal ne Teut mas tajtajpaltik que ne takamet.

²⁶ Shikitakan ne anmutanutzalis, nukniwan: ka te mijmiak ne kimatit wey tik inweyka; te mijmiak ne welit wey; te mijmiak ne wejweymet. ²⁷ Ne Teut kishpejpentuk tay ne tzuntet tik ne taltikpak pal kichiwa ma ishpinawakan ne kimatit wey, wan ne Teut kishpejpentuk ne kukuyanit ipal ne taltikpak pal kichiwa ma ishpinawakan ne tajtajpaltik, ²⁸ wan ne Teut kishpejpentuk ne chijchikitik ipal ne taltikpak wan ne muilwiat ka te tatka inpatiw, yejemet ká te tatka, pal kinpulua ne ká nemit, ²⁹ pal kiane ma te muweymati nian se ká kipia iweyka tik itachialis ne Teut; ³⁰ wan ipanpa, anmejemet nemit ijtik ne Mawaltijtuk Yeshu, ká tupal ne Teut kikweptuk tamatilis, wan tamelakchiwalis wan tateuchiwalis wan tamakishtilis, ³¹ pal muchiwa ijkiunisan ken muijkwilujtuk: "Ká ne muweymati, tik ne Tajtzin muweymatis."