1 Jehaun 1

Reimer 2001

1 Waut fomm Aunfank wea, waut wie jeheat ha, waut wie jeseene ha met onnse eajne Uage, waut wie bekjikjte en onnse Henj aunjefote ha, waut daut Laeweswuut aunbelangt,

² daut Laeweswuat es jeoppenboat worde, en wie ha daut jeseene en jaewe Zeichnes, en moake daut eewjet Laewe bekaunt waut biem Foda wea, en onns jeoppenboat wort.

³ Waut wie jeseene en jeheat ha moak wie junt nu bekaunt, so daut jie uk kjenne met onns Jemeenschoft habe: en onnse Jemeeschoft es met daem Foda en met sien Saen Jesus Christus.

⁴ En dit schriew wie junt daut onnse Freid kaun Follkome senne.

⁵ En dit es de Bootschoft dee wie fonn am jeheat habe en junt bekaunt moake, daut Gott Licht es, en doa es kjeene Diestannes en am.

⁶ Wan wie saije daut wie Jemeenschoft met am habe, oba enn Diestannes waundle, dan leaj wie en doone nich de Woarheit,

⁷ Oba wan wie em Licht waundle so aus hee em Licht es, dan ha wie Jemeenschoft unjarenaunda, en sien Saen Jesus sien Bloot moakt onns rein fonn aule Sind.

⁸ Wan wie saije daut wie kjeene Sind habe, dan schmaea wie onns selfst aun, en de Woarheit es nich enn uns.

⁹ Wan wie unse Sind bekjane, es hee True en jeracht onnse Sind to fejaewe, en onns reim to moake fonn aule Onnjerachtichkjeit.

¹⁰ Wan wie saje daut wie nich jesindicht habe, moak wie am tom Laeajna, en sien Wuat es nich enn onns.