Add parallel Print Page Options

मुखिया लोग इस्राएल अउ यहूदा स पाप करवाएन

“याजकन, सुना! इस्राएल क परिवार, धियान दे! साही परिवार, सुना!

“जदपि तू पचे अइसा लुकान रहा जइसा कि मिसपा क फंदा मँ अहा अउर तू पचे ताबोर क धरती पइ फइलावा गवा फँदन क तरह अहा, मइँ तू सबइ क खिलाफ निआव करब। मइँ तू सबन क सजा देबउँ जदपि तू पचे सित्तम क गहरा खाई क नाईं होइ। एप्रैम, मइँ जानत हउँ तू का करत ह। इस्राएल, तू मोसे छिपा भवा नाहीं बा। एप्रैम लखा, इस्राएल अपवित्तर अहइ काहेकि उ रण्डी क नाईं हरकत करत आवत ह। इस्राएल इ सबइ कुकरम कइके आपन क परमेस्सर क लगे लउटइ स रोकत अहइँ। उ पचे मूरती पूजा करइ क मज़बूत इच्छा रखत ह[a] उ पचे यहोवा क नाहीं जनतेन। जउन बातन इस्राएल क गोरव बनावत रही उ ही ओकरे बरे लज्जा लाइहीं। इस्राएल आपन अपराध क कारण ठोकर खावत ह। यहूदा भी ओकरे संग ठोकर खावत ह।

“इस्राएल क लोग ‘भेड़िन’ अउर ‘गइयन’ क साथ लइके यहोवा क बलि चढ़ावइ बरे हेरइ बरे निकरि। मुला उ पचे ओका नाहीं पाइ सकिहीं। तउ जान जाइहीं कि उ ओनसे दूर चला गवा अहइँ। यहोवा ओन पइ बिस्सास किहेन, मुला उ पचे ओकर संग धोखा किहेस। लखा, उ पचे अवैध गदेलन क जन्म दिहेस ह। हाली ही यहोवा ओनकर समुचइ फसलन क एक ठु महीना मँ ही दुस्मन क जरिये खतम करइ देब्या।”

इस्राएल क बिनास क भविस्सबाणी

“गिबाह मँ नरसिंगहा बजावा;
    रामा मँ तू तुरही बजावा।
बेतावेन मँ जोरदार आवाज़ करा।
    हे बिन्यामीन, लखा!
जब सज़ा क समइ आइ,
    एप्रैम पूरी तरह स बर्बाद कीन्ह जाब्या।
तू निहचय होइ सकत ह कि मइँ इस्राएल क कबीला क बीच स
    जउन बोलत हउँ इ फुरइ अहइ।
10 यहूदा क मुखिया उ मनई क तरह होइ जउन दूसर लोगन क भइँया क लेइ बरे चउहद्दी क निसान क पाथरन खिसकावत ह।
    तउ मइँ ओह पइ आपन किरोध पानी क तरह उण्डेलब।
11 एप्रैम क सजा दीन्ह जाइ,
    ओका कुचरि दीन्ह अउ मसरि दीन्ह जाइ जइसे अंगूरे क पीस दीन्ह जात ह।
    काहेकि उ निकम्मा क अनुसरण करइ क निहचइ किहेस ह।
12 मइँ एप्रैम क अइसे नस्ट करब जइसे कउनो घुन कउनो काठे क नस्ट करत ह।
    अउर मइँ यहूदा क वइसे नस्ट करब जइसे जंग कउनो धातू क नस्ट करत ह।
13 एप्रैम जान लिहेस कि उ रोगग्रस्त अहइ; यहूदा आपन घाव लखेस।
    एप्रैम अउर यहूदा अस्सूर क ‘महान राजा’ क लगे मदद बरे गएन।
किन्तु महान राजा तोहार रोग क नीक करइ मँ
    या तोहार घाव भरि मँ असमर्थ रहेन।
14 मइँ एप्रैम बरे एक सेर क नाईं होब।
    मइँ यहूदा क संग एक जवान सेर क नाईं हरकत करब।
मइँ ओनका टुका मँ चीड़ देब
अउर ओनका दूर लइ जाब।
    कउनो भी ओनका मोसा बचाइ नाहीं पाइ।
15 फुन मइँ आपन जगह रहइ बरे लउट जाब
    जब तलक कि उ पचे आपन कसूर स्वीकार न करइ लेइ
    अउर मोका हेरत भए न आ जाइ।
जब उ पचे विपदन मँ होइ, उ पचे मोका, मोह स मदद लेइ बरे हेरइहीं।”

Footnotes

  1. 5:4 उ पचे … रखत ह साब्दिक अरथ ओनमा रण्डीबाजी क आतिमा अहइ।