यर्मिया 20

Nepali Bible: Easy-to-Read Version

⁷ हे परमप्रभु! तपाईंले मलाई धोका दिनुभयो, अनि म धोकामा परे।
    तपाईं बलियो हुनुहुन्छ, यसर्थ तपाईंले मलाई जित्नु भयो।
मानिसहरू मलाई देखेर हाँस्छन्।
    अनि दिनभरि मलाई हाँसोको पात्र बनाउँछन्।
⁸ जब जब म बोल्छु, चिच्याउँछु,
    म हिंसा र विनाशको विरोधमा चिच्याइरहेछु।
म मानिसहरूलाई त्यो सन्देश भन्छु जुन परमप्रभुले मलाई भन्नुभयो।
    तर मानिसहरूले सधैँ मसित खिसी गर्छन् र मेरो हाँसो उडाउँछन्।
⁹ कहिले काँही म स्वयंलाई भन्छु,
“म परमप्रभु विषयमा सबै भुल्नेछु
    अनि म अब उप्रान्त परमेश्वरको नाउँमा बोल्ने छैन।”
तर जब म त्यसो भन्छु,
    परमप्रभुको वचनहरू मेरो हड्डीभित्र
आगो जलिरहे झैं म भित्र बल्छ।
    यसले मलाई थकाउँछ अनि म सहन सक्तिनँ।
¹⁰ म मेरो विषयमा मानिसहरू
    जहीं-तहीं कानेखुशी गरेको सुन्छु,
तिनीहरू भन्छन्,
    “चारैतिर आतंक छ!
यो घोषणा गरौं।
    मेरा साथीहरू पनि मलाई
भ्रममा पार्न पर्खिरहेका छन्।
    यी मानिसहरू भन्छन्
    सायद उसलाई छक्काउनु
अनि हामी जित्न सक्छौ।
    तब ऊ माथि हामी बद्ला लिनेछौं।”
¹¹ तर परमप्रभु मसँग
    बलियो सिपाही जस्तो हुनुहुन्छ।
यसकारण मानिसहरू,
    जो मेरो पछि लागेकाछन्,
तिनीहरू लट्पटिनेछन्,
    अनि मलाई जित्नु सक्ने छैनन्।
तिनीहरू हारको सम्मुख हुनु पर्नेछ,
    लज्जित हुनेछन् र यो कहिल्यै भुलिनेछैन।

¹⁴ म जन्मेको दिन श्रापित होस्।
    त्यो दिनलाई धन्य नमान जुन दिन म आमासँग थिएँ।
¹⁵ त्यो मानिस श्रापित होस्
    जसले मेरा बाबुलाई म जन्मेको खबर सुनायो
    उसले भन्यो, “तिमीले एउटा छोरो पायौ।”
उसले मेरो बाबुलाई अत्यन्त खुशी बनायो
    जब उसले मेरो बाबुलाई त्यो खबर सुनायो।
¹⁶ त्यो मानिस परमेश्वरले ध्वंस गर्नु भएको शहरहरू जस्तै होस्।
    ती शहरहरूमाथि परमप्रभुको दया छैन।
त्यस मानिसले बिहान कष्टको आवाज सुनोस्,
    अनि मध्य दिनमा युद्धको चिच्चाहट सुनोस्।
¹⁷ किनभने जब म आमाको गर्भमा थिएँ,
    त्यस मानिसले मलाई मारेन।
यदि त्यसले मलाई त्यस बेला मारेको भए,
    मेरो चिहान मेरी आमाहुनै हुने थिइन्।
    अनि म संसारमा जन्मनु पर्ने थिएन।
¹⁸ यी सब शोकहरू र सङ्कटहरू भोग्न,
    अनि लज्जित भएर दिन बिताउन,
    मेरी आमाको गर्भबाट म किन जन्मे?