Add parallel Print Page Options

चाँदी क तुरहियन

10 यहोवा मूसा स कहेस, “तुरहियन बनवइ बरे चाँदी क प्रयोग करा। चाँदी क पतरी बनाइके ओसे दुइ तुरहियन बनावा। इ सबइ तुरहियन क उपयोग मनइयन क एक संग बोलावइ अउ इ बतावइ बरे कि सिबिर क लइक कब चलइ चाही। जब तू इ तुरहियन क बजउब्या, तउ सबहिं मनइयन क मिलापवाला तम्बू क प्रवेस दुआर प बटुर जाइ चाही। अगर तू एक ही तुरही दर तलक बजउब्या तब सिरिफ नेता लोग अइहीं। (इस्राएल क बारहु परिवारे क मुखिया तोहरे समन्वा बटुर जइहीं।)

“जब तू तुरहियन क चेताउनी क रूप मँ बजाउब इ मनइयन क सिबिर क लेकइ चलइ चाही। जब तू पहिली दाईं तू तुरहियन क चेताउनी क रूप मँ बजउब्या, तउ मिलापवाला तम्बू क पूरब कइँती क परिवार दलन क चलब सुरू करइ चाही। दूसरी दाई जब तू तुरहियन क चेताउनी क रूप मँ बजउब्या, मिलापवाला तम्बू क ढक्खिन कइँती क परिवार दलन क सिबिर जमाए भए मनइयन क आगे चलब सुरू करइ क होइ। जब तू कउनो खास सभा बरे मनइयन क बटोरइ चाहा, तउ तुरहियन क दूसरे ढंग स लम्बी थिरान अवाजे मँ बजावा। सिरिफ हारून क याजक बेटवन ही तुरहियन बजाइ सकत हीं। इ तू सब पचन बरे नेमॅ अहइ जउन हमेसा अगवा क पीढ़ी दर पीढ़ी चलत रही।

“जदि तू आपन देस मँ दुस्मन स लड़त रहा हवा तउ ओनसे लड़इ स पहिले तुरहियन क चेताउनी क रूप म बजावा। तब यहोवा तोहार परमेस्सर तोहार बात सुनी अउ तू सबन क दुस्मनन स बचाइ। 10 तू सबन क आपन खास बइठक, नवा चन्द्रमा क दिना पइ अउ खुसी क टेमॅ प तुरहियन बजावइ चाही। जब तू पचे होमबलि अउ मेलबलि द्या, तउ तुरहियन बजावा। इ यहोवा तोहार परमेस्सर बरे तोहका याद रखइ बरे खास तरीका होइ।”

इस्राएल क लोग सिबिर लइ जात हीं

11 जब इस्राएल क मनइयन मिस्र छोड़ी दिहेन ओकरे पाछे दूसर बरिस क दूसर महीना क बीसवाँ दिन करार क तम्बू क ऊपर स बादर उठा। 12 एह बरे इस्राएल क मनइयन आपन जात्रा सुरु किहेन। उ सबइ सीनै क रेगिस्तान तजि दिहेन अउ तब तलक जात्रा करत रहेन जब ताई बादर पारान क रेगिस्तान मँ नाहीं थमा। 13 इ पहिली दाईं रही जब मनइयन सिबिर लइ गएन। जइसा यहोवा मूसा क हुकुम दिहेस वइसा सिबिर क चलाएन।

14 सबसे पहिले यहूदा क सिबिर स तीन दल गएन। उ पचे झण्डा लइके जात्रा किहेन। पहिला समूह यहूदा क परिवार समूह क रहा। अम्मीनादाब क पूत नहसोन उ दल क नेता रहा। 15 ओकरे पाछे इस्साकार क परिवार समूह आवा। सूआर क पूत नतनेल उ समूह क नेता रहा। 16 अउर तब जबूलून क परिवार समूह आवा। हेलोन क पूत एलीआब उ समूह क नेता रहा।

17 तब पवित्तर तम्बू उतारा गवा। गेर्सोन अउ मरारी परिवार क मनइयन पवित्तर तम्बू क लइके चलेन। एह बरे इ परिवारे क लोग कतार मँ ठीक पाछे रहेन।

18 तब रूबेन क सिबिर स तीन दल आएन। उ पचे आपन निसान लइके जात्र किहेन। पहिला समूह रूबेन परिवार क रहा। सदेऊर क पूत एलीआज़ार इ समूह क नेता रहा। 19 ओकरे पाछे सिमोन क परिवार समूह आवा। सूरीसद्दै क पूत सलूमीएल उ समूह क नेता रहा। 20 अउर तब गाद क परिवार समूह आवा। दूएल क पूत एलिअसफ इ समूह क नेता रहा। 21 तब कोहात परिवार क लोग आएन। उ पचे ओन परित्र चीजन क ढोएन जउन पवित्तर ठउर मँ धरी रहिन। अब पवित्तर तम्बू क इ समूहन क नवा सिबिर मँ पहुँचइ क पहिले लगाइ द्या।

22 ऍकरे पाछे एप्रैम क सिबिर क तीन समूह आएन। उ पचे आपन झण्डा लइके जात्रा किहेन। पहिला समूह एप्रैम क परिवार समूह रहा। अम्मीहूद क पूत एलीसामा उ समूह क नेता रहा। 23 ओकरे पाछे मनस्से क परिवार समूह आवा। पदासूर क पूत गम्लीएल उ दले क नेता रहा। 24 तब बिन्यामीन क परिवार समूह आवा। गिदौनी क पूत अबीदान उ दले क नेता रहा।

25 कतार मँ आखिरी तीन ठु परिवार समूह दूसर सबहिं परिवार समूह बरे पीछ रच्छक रहेन। इ सब समूह दान क सिबिर स रहेन। उ पचे आपन निसान क संग जात्रा किहन। पहिला समूह दान क परिवार समूह क रहा। अम्मीसद्दै क पूत अहीएजेर उ समूह क नेता रहा। 26 ओकरे ठीक पाछे आसेर क परिवार समूह आवा। ओक्रान क पूत पजीएल उ समूह क नेता रहा। 27 तब नप्ताली क परिवार समूह आवा। एनान क पूत अहीरा उ समूहे क नेता रहा। 28 इहइ तरह इस्राएल एक जगह स दूसर जगह पइ आपन समूहन क साथ, जब कबहुँ भी उ सिबिर लइ जाइ जात्रा करत रहेन।

29 रुएल क पूत होबाब मिद्यानी रहा। (रुएल मूसा क ससुर रहा।) मूसा होबाब स कहेस, “हम पचे उ देस क जात्रा करत अही जेका यहोवा हम पचन क देइ क बचन दिहे अहइ। एह बरे हम लोगन क संग आवा। हम पचे तोहरे संग नीक बेउहार करब। यहोवा इस्राएल बरे नीक चीज देइ क बचन दिहे अहइ।”

30 मुला होबाब जवाब दिहेस, “नाही; मइँ तोहरे संग न जाब। मइँ आपन देस अउ मनइयन क लगे जाब।”

31 तब मूसा कहेस, “मेहरबानी कइके हमका जिन तजा। तू जानत अहा कि रेगिस्तान मँ हम पचन्क कइसा सिबिर लगाइ क होइ। तू हमार राह क देखइया होब्या। 32 अगर तू हमरे संग आवत ह्या तउ यहोवा जउन कछू नीक चीज देइहीं, हम तोहर संग हींसा बाँटब।”

33 उ सबइ यहोवा क पहाड़े स जात्रा सुरू किहेन। याजक लोग करार क सन्दूख लिहन अउ मनइयन क अगवा चलेन। उ पचे सिबिर डावइ बरे उचित ठउर क निहारत निहारत तीन दिना तलक लोगन क आगे-आगे सन्दूख लइ चलत रहेन। 34 यहोवा क बदरा ओनके ऊपर मँड़रात रहा। अउर हर एक भिन्सारे जब उ पचे आपन सिबिर क तजि देत रहेन तउ ओनका राह देखाँवइ बरे बदरा हुवाँ रहत रहा।

35 जब पवित्तर सन्दूख सिबिर स बाहर कइ जात रहा। मूसा हमेसा कहत रहा:

“परमेस्सर, उठा!
    तोहार दुस्मनन छितराइ जाइँ
    तोहार दुस्मन तोहरे समन्वा स पराइ जाइँ।”

36 अउर जब पवित्तर सन्दूख आपन ठउर प धरा जात रहा, तब मूसा सदा कहत रहा,

“हे परमेस्सर इस्राएल क दसिहुँ
    हजार बंस क लगे लउटि आवा।”