अय्यूब 14

Awadhi Bible: Easy-to-Read Version

14 “उहइ दिना स जब हमार मताहरी हम पचन क जन्मेस ह,
    हमार जिन्नगी छोट अउ दुःख स भरी अहइ।
² मनई क जिन्नगी फूल क नाई अहइ जउन हाली जमत ह अउर फुन खतम होइ जात ह।
    मनई क जिन्नगी अहइ जइसे कउनो छाया तनिक देर टोकत ह अउर बनी नाहीं रहत।
³ हे परमेस्सर, का तू उ मनई पइ धियान देब्या जउन मरा भवा लागत ह
    का तू मोर निआउ करइ मोका समन्वा लिअउब्या?

⁴ “कउनो अइसी चीज स जउन खुद स्वच्छ नाहीं अहइ स्वच्छ चीज कउन पाइ सकत ह? कउनो नाहीं।
⁵ मनई क जिन्नगी सीमित अहइ।
    तू ओकर जीवन काल क सीमित कइ दिहेस ह।
    तू मनई बरे जउन सीमा बाँध्या ह, ओका कउनो भी नाहीं बदल सकत।
⁶ तउ परमेस्सर, तू हम पइ आँखी रखब तजि दया।
    हम लोगन क अकेल्ला तजि दया।
    हम पचन्क क आपन जिन्नगी क उहइ तरह समाप्त करइ दया जे तरह मजदूरन आपन काम क समाप्त करत ह।

⁷ “मुला अगर बृच्छ क काटिके गिराइ दीन्ह जाइ
    तउ भी आसा ओका रहत ह कि उ फुन स पनप सकत ह,
    काहेकि ओहमा नई-नई डारन फूटत रइहीं।
⁸ चाहे ओकर जड़न धरती मँ पुरान काहे न होइ जाँइ
    अउर ओकार तना चाहे माटी मँ गल जाइ।
⁹ मुला पानी क सिरिफ गंध स उ नई बढ़त देत ह
    अउर एक पउध क तरह ओहसे डारन फूटत हीं।
¹⁰ मुला एक मनई कमज़ोर होइ जात ह अउ मरि जात ह,
    अउर तब उ चला जात ह।
¹¹ समुद्दर स पानी गाएब होइ सकत ह
    अउर नदियन सूख कइ फट सकत ह,
¹² अउर तउ भी जउन कउनो आपन कब्र मँ मरा भवा अहइ
    कबहुँ भी नाहीं जी उठब!
ओकर नींद स जगाइ स पहिले ही
    आकास लुप्त होइ जाइ।

¹³ “मोर इच्छा अहइ कि तू मोरी कब्र मँ तक तलक छुपाइ लेइ चाही
    जब तलक तोहार किरोध कम नाहीं होइ जाइ।
    अउर तोहका आदेस दीन्ह जाइतेन अउर मोका जगावा जातेन।
¹⁴ अगर कउनो मनई मरि जाइ तउ का जिन्न कबहुँ पउब्या?
    मइँ तब तलक बाट जोहब, जब तलक मोर कर्तव्य पूरा नाहीं होइ जात अउर जब तलक मइँ अजाद न होइ जाऊँ।
¹⁵ हे परमेस्सर, तू मोका बोलउब्या
    अउर मइँ तोहका जवाब देब।
उ तू ही अहइ जउन मोका बनाया ह
    यह बरे तोहका मोह पइ धियान देइ चाही।
¹⁶ तब मोरी इच्छा अहइ कि तू मोर हर कदम क जाँच करा,
    मुला तोहका मोहमाँ कउनो गल्ती खोजइ क कोसिस नाहीं करइ चाही।
¹⁷ तउ इ अइसा होइतेन कि मोर पापन क एक थइला मँ बन्दा कीन्ह जातेन।
    अउर तू मोरे पापन क हटाइ देतेन।

¹⁸ “एक नस्ट भवा पहाड़ क जइसा जेकर टूका ले लइ जात ह
    अउर एक चट्टान जउन आपन जगह स हटाइ लेइ जात ह।
¹⁹ जइसे पानी पाथर क घाँसि डावत ह
    अउ माटी क पानी बहाइके तल मँ लइ जात ह।
    हे परमेस्सर, उहइ तरह मनई क आसा क तू नस्ट करत अहा।
²⁰ तू एक दाँइ मनई क हरावत अहा
    अउर उ खतम होइ जात ह।
तू ओकरे मुँह बिगाड़त ह
    अउर ओका पठइ देत ह।
²¹ अगर ओकर पूत कबहुँ सन्मान पावत हीं तउ ओका कबहुँ ओकर पता नाहीं चल पावत।
    अगर ओकर पूत कबहुँ अपमान भोगत हीं, तउ उ कबहुँ ओका लखि नाहीं पावत ह।
²² तउ मनई क देह क कारण ही ओका पीड़ा होत ह
    अउर ओकर आतिमा ओकरे बरे सोक मनावत ह।”