پەندەکانی سلێمان 28

Kurdi Sorani Standard

28 بەدکار بێ ئەوەی کەس ڕاوی بنێت هەڵدێت؟
    بەڵام ڕاستودروست وەک بەچکە شێر چاونەترسە.

² کە یاخیبوون لە خاکێک هەبێت میری زۆر دەبێت،
    بەڵام فەرمانڕەوایەکی تێگەیشتوو و زانا نیشتیمان بەرقەرار دەکات.

³ ئەو سەرکردەیەی هەژاران بچەوسێنێتەوە،
    بارانێکی بەخوڕە هیچ خۆراکێک ناهێڵێتەوە.

⁴ ئەوانەی واز لە تەورات^[a] دەهێنن ستایشی بەدکار دەکەن،
    بەڵام پارێزەرانی تەورات دژایەتییان دەکەن.

⁵ پیاوخراپان لە دادپەروەری تێناگەن،
    بەڵام ئەوانەی ڕوو لە یەزدان دەکەن تەواو تێدەگەن.

⁶ باشترە هەژار ڕێگای تەواوەتی گرتبێت،
    لە دەوڵەمەند کە ڕێگاکان خواردەکاتەوە.

⁷ ئەوەی تەورات بپارێزێت کوڕێکی تێگەیشتووە،
    بەڵام هاوڕێی دەستبڵاوان باوکی خۆی ڕیسوا دەکات.

⁸ ئەوەی بە سوو و بازاڕگرانکردن سامانی خۆی زۆر بکات،
    بۆ یەکێکی کۆدەکاتەوە کە بەزەیی بە نەداران دێتەوە.

⁹ ئەوەی گوێی دابخات لە بیستنی فێرکردنەکەم،
    تەنانەت نوێژەکەشی قێزەونە.

¹⁰ ئەوەی سەرڕاستان وێڵی ڕێگای خراپە بکات،
    دەکەوێتە ئەو چاڵەوە کە خۆی هەڵیکەندووە،
    بەڵام ئەوانەی کە بێ کەموکوڕین میراتی باشیان بەردەکەوێت.

¹¹ دەوڵەمەند لەبەرچاوی خۆی دانایە،
    بەڵام هەژاری تێگەیشتوو دەیپشکنێت.

¹² لە سەرکەوتنی ڕاستودروستان شانازییەکی گەورە هەیە،
    بەڵام لە هەستانی بەدکاران خەڵکی خۆیان دەشارنەوە.

¹³ ئەوەی گوناهەکانی خۆی بشارێتەوە سەرناکەوێت،
    بەڵام دانپێدانەر و وازلێهێنەر بەر بەزەیی دەکەوێت.

¹⁴ خۆزگە دەخوازرێ بە کەسێک بەردەوام لە یەزدان بترسێت،
    بەڵام ئەوەی دڵی خۆی ڕەق بکات دەکەوێتە خراپەوە.

¹⁵ وەک شێرێکی بە نەڕەنەڕ و ورچێکی هەڵچووە،
    فەرمانڕەوای بەدکار بەسەر گەلی نەدارەوە.

¹⁶ فەرمانڕەوای ناتێگەیشتوو زۆرداری زۆر دەکات،
    بەڵام ئەوەی ڕقی لە دەستکەوتی ناڕەوا بێت تەمەن درێژ دەبێت.

¹⁷ ئەوەی خوێنی کەسێکی لە مل بێت
    هەتا ڕۆژی مردنی هەڵاتوو دەبێت.
    با کەس پشتیوانی نەکات.

¹⁸ ئەوەی بە ڕێگای تەواویدا بڕوات ڕزگار دەبێت،
    بەڵام ئەوەی ڕێگاکانی خوار بکات لەپڕ دەکەوێت.

¹⁹ ئەوەی خزمەتی زەوی خۆی بکات تێر نان دەبێت،
    بەڵام ئەوەی دوای هیچوپووچی بکەوێت تێر هەژاری دەبێت.

²⁰ کەسی دڵسۆز بەرەکەتی زۆرە،
    بەڵام ئەوەی بە پەلە بێت بۆ دەوڵەمەندی بێ سزا نابێت.

²¹ لایەنگری باش نییە،
    بەڵام مرۆڤ بۆ لەتە نانێک گوناه دەکات.

²² کەسی بەرچاوتەنگ بە پەلەیە بۆ دەوڵەمەندی،
    بەڵام نازانێت نەبوونی بۆ دێت.

²³ ئەوەی کەسێک سەرزەنشت بکات لە کۆتاییدا پەسەندتر دەبێت
    لەوەی زمانلووسی دەکات.

²⁴ ئەوەی دایک و باوکی تاڵان بکات و
    بڵێت: «ئەمە گوناه نییە!»
    ئەو کەسە هاوبەشی کاولکارانە.

²⁵ چاوبرسی ناکۆکی دەوروژێنێت،
    بەڵام ئەوانەی پشت بە یەزدان دەبەستن سەرکەوتوو دەبن.

²⁶ ئەوەی پشت بە بیرکردنەوەی خۆی ببەستێت گێلە،
    بەڵام ئەوەی بە ڕێگای داناییدا بڕوات دەرباز دەبێت.

²⁷ ئەوەی بە هەژار ببەخشێت نەبوون نابێت،
    بەڵام ئەوەی ڕووی لێ وەرگێڕێت نەفرەتی زۆر دەبێت.

²⁸ بە هەستانی بەدکاران خەڵکی خۆیان دەشارنەوە،
    بەڵام بە لەناوچوونیان ڕاستودروستان گەشە دەکەن.