ئەیوب 41

Kurdi Sorani Standard

41 «ئایا دەتوانیت لیڤیاتان^[a] بە قولاپ ڕاو بکەیت،
    یان زمانی بە گوریس ببەستیتەوە؟
² ئایا دەتوانیت ئەڵقە بخەیتە لووتی
    یان شەویلاکی بە لووتەوانە بسمیت؟
³ ئایا زۆر لێت دەپاڕێتەوە
    یان بە نەرمی قسەت لەگەڵ دەکات؟
⁴ ئایا پەیمانت لەگەڵ دەبەستێت
    کە بە درێژایی ژیانی بیکەیت بە کۆیلەی خۆت؟
⁵ ئایا وەک چۆلەکە یاری لەگەڵ دەکەیت
    یان بۆ کچە منداڵەکانت دەیبەستیتەوە؟
⁶ ئایا ڕاوچییەکان کڕین و فرۆشتنی لەسەر دەکەن
    یان لەنێو بازرگانەکان دابەشی دەکەن؟
⁷ ئایا پێستی پڕ دەکەیت لە ڕم و
    سەریشی پڕ لە تیر؟
⁸ دەستت لەسەری دانێ و بیر لە جەنگ بکەرەوە،
    جارێکی دیکە دووبارەی ناکەیتەوە!
⁹ هیوابوون بە گرتنی خەون بینینە،
    هەر بە بینینی دەتۆقیت.
¹⁰ کەسێک نییە ئەوەندە ئازا بێت بەخەبەری بهێنێت،
    ئیتر کێ هەیە لە ڕووی مندا بوەستێت؟
¹¹ کێ شتێکی پێم بەخشیوە تاکو من بیدەمەوە؟
    ئەوەی لەژێر هەموو ئاسمانە هی منە.

¹² «بێدەنگ نابم لە باسکردنی ئەندامەکانی جەستەی لیڤیاتان و
    لە ڕاگەیاندنی هێزی و لە جوانی ئاکاری جەستەی.
¹³ کێ دەتوانێت پێستەکەی دابماڵێت؟
    کێ دەتوانێت هەردوو لای سپەرەکەی ببڕێت؟
¹⁴ کێ دوو شەویلاکی دەمی دەکاتەوە؟
    ڕیزی ددانەکانی ترسێنەرە.
¹⁵ پشتی بە ڕیزێک قەڵغان داپۆشراوە،
    بە پتەوی بەیەکەوە بەستراوە؛
¹⁶ بە شێوەیەک پێکەوە نووساون کە
    تەنانەت با بە نێوانیاندا ناڕوات.
¹⁷ هەریەکەیان بەوی تەنیشتیەوە نووساوە؛
    پێکەوە بەستراون لێک نابنەوە.
¹⁸ کە دەحیلێنێت بروسکەی ڕووناکی دەدات؛
    چاوەکانی وەک گزنگی بەیانن.
¹⁹ لە دەمیەوە بڵێسەی ئاگر دێتە دەرەوە،
    پریشکی ئاگری لێ دەبێتەوە.
²⁰ لە کونە لووتییەوە دووکەڵ هەڵدەستێت،
    هەروەک سووتانی قامیش لەبن مەنجەڵێکی لە کوڵ.
²¹ هەناسەی خەڵووز دادەگیرسێنێت،
    گڕیش لە دەمیەوە دەڕژێت.
²² هێزەکەی لە ملیدایە،
    لەبەردەمی هەڵوەستەی لێ دەکەن.
²³ گۆشتەکەی قەدقەد پێکەوە نووساوە،
    بەسەر لەشیدا داڕێژراوە و ناجوڵێتەوە.
²⁴ سەرسەختە،
    بە جەرگ و چاونەوترسە.
²⁵ کە هەڵدەستێت بەهێزان دەتۆقن،
    لە ترسی خۆڕاتەکاندنەکەی پەنا دەگرن.
²⁶ شمشێری بەر دەکەوێت بەڵام نایپێکێت،
    نە ڕم و نە تیر.
²⁷ ئاسن لەلای وەک کا وایە،
    بڕۆنزیش وەک داری کلۆر.
²⁸ تیری کەوانەکان نایبەزێنن؛
    بەردی بەردەقانییەکان بەلایەوە وەک پووشن.
²⁹ گورز لەلای وەک کایە؛
    بە ڕاوەشاندنی ڕم پێدەکەنێت.
³⁰ ژێری پارچە گۆزەی تیژە،
    جەنجەڕ بەسەر قوڕدا ڕادەکێشێت.
³¹ وا دەکات قووڵایی وەک مەنجەڵ بکوڵێت،
    دەریا وەک هیزەی زەیت لێ دەکات.
³² لەدوای خۆی هێڵێکی سپی درەوشاوە بەجێدەهێڵێت،
    شەپۆلەکان وەک پرچی سپی لێ دەکات.
³³ لەسەر زەوی هاوشێوەی نییە،
    بۆ نەترسان دروستکراوە.
³⁴ بە سووکییەوە تەماشای لووتبەرزەکان دەکات؛
    پاشای هەموو لەخۆباییەکانە.»