ئیشایا 62

Kurdi Sorani Standard

⁶ ئەی ئۆرشەلیم، ئێشکگرم لەسەر شووراکانت داناوە،
    بەردەوام شەو و ڕۆژ بێدەنگ نابن.
ئەی ئەوانەی یەزدانتان لە یادە،
    ئۆقرە مەگرن،
⁷ لێ مەگەڕێن یەزدان ئۆقرە بگرێت هەتا ئۆرشەلیم دەچەسپێنێت و
    ناوداری دەکات لە زەویدا.

⁸ یەزدان بە دەستی ڕاستی خۆی و
    بە هێزی بازووی سوێندی خوارد:
«چیتر دانەوێڵەکەت
    ناکەم بە خۆراک بۆ دوژمنەکانت و
شەرابە نوێیەکەشت کە پێوەی ماندوو بوویت،
    نامۆکان نایخۆنەوە،
⁹ بەڵکو ئەوانە دەیخۆن کە گەنمیان بەرهەم هێناوە و
    ستایشی یەزدان دەکەن،
ئەوانەی ترێیان ڕنیوەتەوە
    لە حەوشەی پیرۆزگاکەم دەیخۆنەوە.»

¹⁰ تێپەڕ بن! تێپەڕ بن لە دەروازەکانەوە!
    ڕێگای گەل خۆش بکەن.
ئامادەی بکەن! ڕێڕەو ئامادە بکەن!
    لە بەرد پاکی بکەنەوە.
ئاڵا بۆ گەل بەرز بکەنەوە.

¹¹ ئەوەتا یەزدان
    بە هەر چوار لای زەویدا ڕایگەیاندووە:
«بە شاری سییۆن بڵێن،
    ”وا ڕزگارکەرەکەت دێت!
وا پاداشتەکەی لەگەڵیەتی و
    خەڵاتەکەی لەبەردەمییەتی.“»
¹² ناویان لێ دەنێن، «گەلە پیرۆزەکە»،
    «ئەوانەی یەزدان کڕیونیەتیەوە»،
تۆش ناوت لێ دەنرێت، «داواکراوەکە»،
    «شارە بەجێنەماوەکە».