ئیشایا 45

Kurdi Sorani Standard

45 «یەزدان بەم شێوەیە بە کۆرشی دەستنیشانکراوی دەفەرموێت،
    ئەوەی دەستە ڕاستیم گرت
بۆ ئەوەی لەبەردەمی ئەو نەتەوەکان بخەمە ژێر ڕکێفم و
    پاشایان چەک بکەم،
بۆ ئەوەی لەبەردەمیدا دەروازەکان بکەمەوە و
    دەرگاکان دانەخرێن:
² ”من لەپێشتەوە دەڕۆم و
    تەپەکان تەخت دەکەم،
دەروازە بڕۆنزییەکان دەشکێنم و
    شەوبەندە ئاسنینەکان دەبڕمەوە.
³ گەنجینەکانی تاریکی و
    خشڵە شاردراوەکانت دەدەمێ،
هەتا بزانیت کە من یەزدانم، خودای ئیسرائیل،
    ئەوەی بە ناوی خۆتەوە بانگت دەکات.
⁴ لەبەر یاقوبی بەندەم و
    ئیسرائیلی هەڵبژاردەم،
بە ناوی خۆت بانگت دەکەم و
    نازناوی چاکم بە تۆ بەخشی
    هەرچەندە تۆ دان بە مندا نانێیت.
⁵ من یەزدانم و یەکێکی دیکە نییە،
    بێجگە لە من خودای دیکە نییە.
    هەرچەندە دانت بە مندا نەناوە،
    بەڵام من کەمەربەندی تۆ توند دەکەم.
⁶ بۆ ئەوەی لە ڕۆژهەڵاتەوە هەتا ڕۆژئاوا بزانن
    کە بێجگە لە من کەس نییە.
من یەزدانم و یەکێکی دیکە نییە.
⁷ شێوەکێشی ڕووناکی و بەدیهێنەری تاریکیم،
    دروستکەری ئاشتی و بەدیهێنەری خراپەم،^[a]
    من یەزدانم دروستکەری هەموو ئەمانە.“

⁸ «ئەی ئاسمان لە سەرەوە، ڕاستودروستییەکەم ببارێنە،
    با هەورەکان بیپرژێنێت.
با زەوی بکرێتەوە و پێکەوە
    ڕزگاری بەر بگرێت و
ڕاستودروستی سەرهەڵبدات،
    من یەزدانم بەدیم هێنا.

⁹ «قوڕبەسەر ئەوەی کێشە لەگەڵ شێوەکارەکەی دروستدەکات،
    پارچەی گۆزەیەکە لەنێو گۆزەکانی سەر زەوی.
ئایا قوڕ بە گۆزەکەرەکەی دەڵێت: ”چی دروستدەکەیت“
    یان ئیشەکەت: ”دوو دەستی نییە“؟
¹⁰ قوڕبەسەر ئەوەی بە باوکی دەڵێت:
    ”چ منداڵێکت خستەوە؟“
    بە دایکەکەشی: ”چیت لێ دەبێت؟“

¹¹ «یەزدان، پیرۆزەکەی ئیسرائیل و شێوەکێشەکەی،
    ئەمە دەفەرموێت:
دەربارەی ئەوانەی دێت،
    ئایا سەبارەت بە منداڵەکانم لێم بپرسن،
    سەبارەت بە کاری دەستم، ڕامبسپێرن؟
¹² من زەویم دروستکرد و
    مرۆڤی سەریم بەدیهێنا.
دەستەکانی من ئاسمانی لێککردەوە و
    هەموو هێزەکانی ئاسمانم پێکهێنا.
¹³ من کۆرش بە ڕاستودروستی هەڵدەستێنم و
    هەموو ڕێگاکانی ڕێک و ڕاست دەکەم.
ئەو شارەکەم بنیاد دەنێتەوە و
    ڕاپێچکراوەکانم ئازاد دەکات
بەبێ پارە و بەبێ بەرتیل.
    ئەمە فەرمایشتی یەزدانی سوپاسالارە.»

¹⁵ بەڕاستی تۆ خودایەکی خۆت دەشاریتەوە،
    خودای ئیسرائیل، ئەی ڕزگارکەر.
¹⁶ هەروەها هەموو وەستای پەیکەرەکان شەرمەزار و ڕیسوا دەبن،
    پێکەوە بە سەرشۆڕییەوە دەڕۆن،
¹⁷ بەڵام ئیسرائیل بە یەزدان ڕزگاری دەبێت،
    بە ڕزگارییەکی هەتاهەتایی.
شەرمەزار و ڕیسوا نابن
    هەتاهەتایە.

¹⁸ چونکە یەزدان ئەمە دەفەرموێت،
بەدیهێنەری ئاسمان،
    ئەو خودایە،
شێوەکێشی زەوی و دروستکەری،
    ئەو دایمەزراند.
بەخۆڕایی بەدی نەهێنا،
    بەڵام بۆ نیشتەجێبوون شێوەی کێشا،
دەفەرموێت:
«من یەزدانم و
    یەکێکی دیکە نییە.
¹⁹ لە پەناوە قسەم نەکرد،
    لە شوێنێکی تاریکی زەوی.
بە توخمی یاقوبم نەفەرموو،
    ”بەخۆڕایی بەدوامدا بگەڕێن.“
من یەزدانم بە ڕاستی دەدوێم،
    بە ڕاستودروستی ڕایدەگەیەنم.

²⁰ «کۆببنەوە و وەرن،
    ئەی دەربازبووانی نەتەوەکان، پێکەوە وەرنە پێش.
نازانن ئەوانەی هەڵیانگرتووە، داری بتە داتاشراوەکانیان،
    ئەوانەی داوا لە خوداوەندێک دەکەن کە ڕزگار ناکات.
²¹ ڕایبگەیەنن و وەرنە پێش.
    با ئەوان پێکەوە ڕاوێژ بکەن.
لە کۆنەوە کێ پێشبینی ئەمەی کردووە،
    لە دێرزەمانەوە ڕایگەیاندووە؟
ئایا منی یەزدان نەبوو؟
    بێجگە لە من هیچ خودایەک بێت،
خودایەکی ڕاستودروست و ڕزگارکەر
    بێجگە لە من نییە.

²² «ڕوو لە من بکەن و ڕزگارتان بێت،
    ئەی هەموو لایەکانی زەوی،
    چونکە من خودام و یەکێکی دیکە نییە.
²³ سوێندم بە گیانی خۆم خوارد،
    ڕاستی لە دەممەوە هاتە دەرەوە،
    وشەیەکە و ناگەڕێتەوە،
کە هەموو ئەژنۆیەک بۆ من چۆک دەدات،
    هەموو زمانێک بە من سوێند دەخوات.
²⁴ سەبارەت بە من دەڵێن: ”ڕاستودروستی و هێز
    تەنها بە یەزدانە.“»
هەموو ئەوانەی ڕقیان لێی هەستاوە
    بۆ لای ئەو دێن و شەرمەزار دەبن،
²⁵ بەڵام هەموو توخمی ئیسرائیل
    بە یەزدان ڕاستودروست دەبن و شانازی دەکەن.